Read Zotung Chin JOB 23 Bible Online

JOB 23 - Zotung Chin bible

JOB 23

¹Oute Job nynh khung zah:

²“Ka rah ka khui salamah a kuih tuh myarya ari keiccuze, atunin mah myarya ka bokhaekuh.

³Pachia muih khonaw hmin kha ka nyh ravo nyn, amaw a umnaw hmin kalan maw ka thua kho ravo nyn!

⁴A malang khe ka byathan kha ka thaesah cih zah, ka byathan akonglang kha hoyte ka hopah cih.

⁵Aning nynh bya yn khungpaw kha ka thae cih zah, yn hopyapaw kha ka nyhthya cih.

⁶Aning nynh a huhan lesaenaw khate kae kha yn rawse cih tou? Yn rawse lan khyh; ka bya kha yn ngaepah cih.

⁷Amaw malang khe miding nynh tuh bya a hokhae kho cih, te bya yn piatu nynh zungzae luenaw yn pya cih.

⁸“Malang ka ccia ze, tuin kya Pachia um khyh, nulang ka sihku ze, amaw kha ka muih kho khyh;

⁹voilang khe a reku ze, amaw kha ka muih kho khyh; ranglang ka maekuh zahmah, amaw kha ka muih khualae khyh.

¹⁰Thuasalama ka zuipaw laanpi kha aning nynh a ny; aning nynh he yn syntawtua ze, sui hawte ka langkuh cih.

¹¹Ka ccu nynh a laanpi kha tynkaring lan a zui; a laanpi kha ka zui zah ccanglang ka maekuh khyh.

¹²A mung kyate a poupaw kawbya kha ka vua khyh; a hopaw bya kha ka by kya ka ccykeku.

¹³Thuasalama Pachia tuh a rulaekuh leipaw thua zah, hum nynh mou a rulae kho cih? A rypaw kha pharung a cyi.

¹⁴Ka hanlan yn paccynpyapaw kha a ccingsah cih; tuhcihawpaw paccynkunaw patae kha a thinlung kya a um.

¹⁵Tukeiccuze amaw malang khe ka siikuh zah, he ka tua vae ze, amaw kha ka rih.

¹⁶Pachia nynh ka lungthaw yn zyasah vae; Athunghuapaw nynh yn risah vae.

¹⁷Mohnaw liate kae hynh ro ka thua khyh; Marae zipaw mohnaw kha ka kyate a thuruh vae.