Read Zotung Chin JOB 27 Bible Online

JOB 27 - Zotung Chin bible

JOB 27

¹Job nynh bya bua ho zah:

²“Ka dingnaw kha pawlang yn riapah leipaw Pachia, ka hiinnaw kha vawsaw yn pyapaw Athunghuapaw tuh ahiinpaw athua thyhte,

³ka hy tuh ka kya um zah Pachia thaw tuh ka naduh kya a um lungkhu balyn,

⁴ka mung nynh hynbya ho lan khyh zah, ka lae nynh lingnaw byaho lan khyh.

⁵Nanning na hme oh cipaw bya tuh ka kyate sawkuh sah; ka chi makhia ka dingnaw kha ka vua lan khyh.

⁶Ka dingnaw kha tynkaring lan ka kyngkuh zah ka saw lan khyh; ka hiin lungkhu balyn ka thawthaekuh lan khyh.

⁷“Ka rhawpaw tuh ccungccaw hoyleipaw hawte thua sah lah, kae yn rawsepaw tuh a ding leipaw hawte thua vae sah.

⁸Pachia nynh amaw pawlangria leipaw kha he a vua te, Pachia nynh a hiinnaw kha he a lah te, aning nynh paw ngaehoinaw mou a hoi ung?

⁹Vawsawnaw nynh a tungvaw he a thuanua te, Pachia nynh a siaruanaw kha a thaepah ung cih tou?

¹⁰Aning nynh Athunghuapaw tungvaw a lungrythua vema? Accyh takyh kya Pachia kha ko vema?

¹¹Pachia rya a lawpaw kong kha kae hopah cih oh; Athunghuapaw nynh a paccynpaw kha ka pheii lan khyh.

¹²Nanning balyn nynh phe na muih vae oh; pawccemou accakaepaw bya hynh palei na ho oh?

¹³“Pachia nynh ccungccaw hoyleipaw hanpaw lang a pyapaw, te tuaasahnaw a raetupaw nynh Athunghuapaw kyate a muepaw rho tuh hynh-e nynh thua:

¹⁴A ccaaw hae tuh alung hae zemah, thaloi te a chih hae; a ciihan hae tuh looh phe zaw lan hoi khyh hae.

¹⁵Amaw koute a hiinhy hae paw kha shethya nynh shawku kya a uh cih hae, a nomae hae nynh heize rawhui kho vae khyh hae.

¹⁶Aning nynh ngunphua kha laenoi hawte a pum zemah boeiningsungpue kha anglae hawte a pum zemah,

¹⁷tuh-e boeining hae tuh miding hae nynh a lawkuh cih hae zah, ngunphua kha seinaw hoi lei hae paw nynh a neekuh cih hae.

¹⁸A inn kha pavaw bu hawte sakkuh zah, misu khokhu a ngawtupaw nynh a sakkupaw buhang te nynh aloku.

¹⁹Aning tuh hoirumte a ih, thuasalama tuhcite thua vae lan khyh; he yn thaekuh tuh, a sisua tuh phe zo vae.

²⁰Rinaw nynh tui alepaw hawte phe a phya; khuazi khe khiccung nynh a zoukhae.

²¹Nithua lang e khisan nynh zoukhae thung zah, aning tuh phe a zo; a umnaw hmin kyate ccaring a zoukhae.

²²Tuh-e khisan nynh thawcci leite aning kha ccaring a vua; aning tuh khisan huhan kyate lue khylan rangkhirangkhaete a ccue.

²³A kuih bianua zah, a umnaw hmin kyate a roisaw zah a sarya.