Read Zotung Chin JOB 28 Bible Online

JOB 28 - Zotung Chin bible

JOB 28

¹“Ngun thaenaw akhu tuh um ccaccing zah, sui thyaasahnaw hmin mah a um.

²Sivaw tuh laephi lungkhu te lah hae zah, sohin tuh lung kha tuisahte a law hae.

³Lungthaetu nynh akhu huaccepaw mohnaw kyacia a ccung, laephi alungkhu lang, marae zipaw mohnaw kya umpaw lung kha a ccung.

⁴Ccungccaw umnaw kyate asawnaw umpaw accya khe akhu kha a thae hae, khuaccong hae paw nynh minmin kha a ning hae, ccungccaw te asawkunaw akhu lungkhu langkhe arui a sae hae.

⁵Laephi vawlan looh po salamah lae kaw lang tuh maee te upaw hawte aroh.

⁶Laephi kya-e lung a lungkhu tuin aphutepaw nilar lung a um, a laenoi kyakhe sui a umbua.

⁷“Tuh-e akhu lungkhu lang cceihpaw laanpi tuh saw a aethyapaw pavaw nynh nyh khyh zah, mosi mit nynh mah muih khyh.

⁸Tuh-e laanpi tuh arepaw loramsaw nynh sy khyh zah, chindeih nynh mah po ccia phaly boi khyh.

⁹“Ccungccaw hae nynh atangpaw lungpi vawlan khe mih kuih khang hae zah mua hae kha aleihpaw kyate a dawleih hae.

¹⁰Lungpi kyakhe akarung po thae hae zah mih mit nynh aphutepaw uccaw miakaw kha a muih.

¹¹Vawkhu kha ting hae zah alangkuh leipaw uccaw hae kha a langsaku hae.

¹²“Thuasalama hawnaw kha teimou muih athua cih? Nythyanaw hmin tuh teimou a um?

¹³Ccungccaw nynh tuh-e hawnaw kalan ccianaw laanpi tuh nyh khyh, a hiin hae paw umnaw kya muih kho thua khyh.

¹⁴Akhupaw rilipi nynh, ‘Ka kya hawnaw um khyh,’ a ci, rili nynh mah, ‘Ka kya um khyh,’ a ci.

¹⁵Hawnaw kha sui te re kho thua khyh, hawnaw mee kha ngunphua te tou kho thua khyh.

¹⁶Ofir sui te thuasah, aphutepaw oniks te nilar lung khate thuasah a mee khya kho thua khyh.

¹⁷Hawnaw tuh sui te thawlang khate ngankuh kho khyh, aphutepaw sui ccipaw te mah rulaeku kho thua khyh.

¹⁸Koral lung te alabaster lung tuh hawnaw te hokhia lanpaw thua khyh hae; hawnaw mee tuh palee mee laeze ahanghua.

¹⁹Ethiopia ram e topaz lung te khinkhia kho thua khyh, sui ccipaw te mah amee khya kho thua khyh.

²⁰“Tuhteze hawnaw tuh teitemou yn thua? Nythyanaw hmin tuh teimou a um?

²¹Ahiinpaw ahysuepaw balyn nynh muih kho khyh hae, vaawlang e pavaw hae nynh mah muih kho khyh hae.

²²Abaddon te Chinaw nynh, ‘Hawnaw kong laanbya kha kae nakaring te kae thae vae,’ a ci hae.

²³“Pachia nynh hawnaw kalan ccianaw laanpi kha nyh zah, hawnaw hmin kha mah a ny.

²⁴Pawccecize aning nynh laephi adianaw cia muih zah, vaawlui zakaw e atyn-are kha a muih.

²⁵Pachia nynh khivae kha akhin sae zah, tui kha tounawpaw te ramri a ia,

²⁶te khuaarawnaw phunglang kha rae zah, riakawnaw laanpi kha he a rae tuh,

²⁷Pachia nynh hawnaw kha muih zah a nysah hae; hawnaw kha tynsah zah a langsaku.

²⁸Pachia nynh ccungccaw kha, ‘Thanccingte, BAWIPAW rawri tuh hawnaw nynh thua; hoyleinaw sibia tuh nythyanaw nynh thua,’ a cipya,” a ci.