Read Zotung Chin JOB 29 Bible Online

JOB 29 - Zotung Chin bible

JOB 29

¹Job nynh bya bua ho zah:

²“Langmawlya e ninsaw hae, Pachia nynh yn do-oih lya hawte ka thua hin sah lah;

³tuh lya tuh ka lu vawlan Pachia maeekhua aw zah, tuh-e amaw awnaw liate mohnaw kya ka cceih kho;

⁴ka ngawphue lya, Pachia kya-e ccuepekunaw ka inn kya a um lya hawte ka thua hin sah lah;

⁵tuh lya tuh Athunghuapaw tuh ka kya um zah, ka ccaaw hae nynh yn koihlu hae;

⁶ka ccianaw laanpi kya mateitui lua zah lung nynh ka hanlan chitui kha a phyhsah lya hawte thua hin sah lah!

⁷Khua kya-e koikua kalan ka cceih zah, khualae laanluepi kya ka haung lyakhe,

⁸ccangvae hae nynh yn muih hae zah nulang yn sitawku hae, piccan hae tuh thokute a thadyn hae;

⁹cciakhaetu hae tuh byaho sungkuh hae zah, mih kuih te mih mung kha a huku hae;

¹⁰piccanhua hae roi tuh zya dae zah, mih lae tuh mih dan kya abekuh.

¹¹Ka bya he a thae hae te, ka the yn hoysah hae zah, he yn muih hae te, ka ccaekia lang a tang hae;

¹²pawccecize a rah hae paw ryachi hae te bawmtu hoi leipaw ngawraw hae kha ka khum hae.

¹³Lungriathae hae paw nynh oun thuakhae hae paw hythuanaw kha ka ccou, nomae hae kha lungtuanaw hlaw ka sahsah hae.

¹⁴Dingnaw kha boeining hawte ka lawku; byading tuh ka hanlan angkiccua te pungde hawte nynh thua.

¹⁵Mitmoh hae hanlan mit ka thua zah, ccukhou hae hanlan ccu nynh ka thua.

¹⁶Ryachi hae hanlan paaw ka thua zah, mikhia hae kha mih byathan kya ka pankhaw hae.

¹⁷A ding lei hae paw mih nua kha ka khyapah hae zah, a tei hae paw saw kha mih haw kyate ka lua hae.

¹⁸‘Ka bu kya ka chih cih, ka hiin nin hae tuh laesia zeih acih cih,

¹⁹ka tharui hae tuh tui kalan khe pazaekuh zah, ka karan hae vawlan khe dangtui zidae accah;

²⁰ka phu-enaw tuh po tyn zah, ka li tuh ka kuih kya thawrarih lan zungzae a um,’ cite ka la tuaku.

²¹“Ming hae nynh ka bya kha ngae hae zah phang yn ngaw hae, tuanaw ka pya hae paw kha yccae khyh hae.

²²Bya ka ho koute minmin nynh bya bua ho vae khyh hae, ka bya tuh dangtui hawte mih tungvaw accah.

²³Khuaatui ngaw hawte kae kha yn ngaw hae; hawkhuaa hawte mih khalang kha yn awnua hae.

²⁴Zynkunaw a hoi khyh lya hae khe nuinzazyh lan ka umpya hae; ka mitmae hoynaw kha nynh lungthawsaenaw a pya hae.

²⁵Mih laanpi kha ka popah hae zah lupi lante ka haung, a rhawkaw hae laku umpaw siapharan hawte thuasah, a rah a khui hae paw kha lungtangnaw a pyatupaw hawte thuasah ka umpya hae.