Read Zotung Chin JOB 3 Bible Online

JOB 3 - Zotung Chin bible

JOB 3

¹Tukoute Job nynh a khalang aw zah a pui nin kha thya a law.

²Job nynh a hopaw tuh:

³“Ka pui nin tuh roh sah lah, ‘Ccapaw kha poi athua vae,’ a ci hae khuazi kha mah roh sah.

⁴Ka pui nin tuh moh sah! Ahangnaw umpaw Pachia nynh khah-e nin kha ccung nan sah, awnaw nynh mah khah-e nin kya aw nan sah.

⁵Ngaethyanaw te marae zipaw mohnaw nynh khah-e nin kha kae kya-e nynh thua, ci hae sah; Maeking nynh khah-e nin kha zithin sah; khuadae e mohnaw nynh khah-e nin kha ri lan umpaw nin lang tangsah sah.

⁶Khah-e khuazi kha marae zipaw mohnaw nynh phang bong sah! Kum kya-e nin hae laku kya a lungtuabua nan sah; sawpaw rianaw kya mah umbua nan sah.

⁷Khah-e khuazi tuh daetedae sah lah, lungtuanaw roi mah thae thua nan sah.

⁸Nin kha thya a lawthya hae paw te Leviathan hupi kha thosahku lan kaw a pyathya hae paw nynh khah-e khuazi kha thyalaw hae sah.

⁹Khah-e khuazi khua adae takaw e awsi hae tuh moh hae sah; awnaw kha ngaehoi salamah paw sanmah mue nan sah; awkhua khuadaepaw kha muih nan sah,

¹⁰pawccecize ka nung vue thuakaw kha khaw khyh zah, vawsawnaw kha ka muih khyh nawlan thuruh khyh.

¹¹“Pawccemou ka pui lyakhe ka la chi khyh? Pawccemou vue kyate ka pou lyakhe ka hy a la thang khyh?

¹²Pawccemou ccukharu vawlan yn la dua hae zah, matei yn la zusah hae?

¹³Khah lyakhe ka la chi lanze, atu tuh zya ka huekuh vae cih zah daetedae lan ka um vae cih paw; zya ka ih vae cih paw;

¹⁴khuapi arohpaw kha mimaw hanlan a raekuh thui hae paw laephi siapharan hae te uktu bawi hae ryte thuasah,

¹⁵mih inn kya sui te ngun phe a biasah hae paw bawi hae ryte thuasah phe ka haeung vae cih.

¹⁶Tuhkhyhze, pawccemou achihte yn puipaw imua hawte thuasah, awnaw a muih boi leipaw nosi hawte thuasah yn la uu khyh hae?

¹⁷Tuin kya tuh ccungccaw hoylei hae paw nynh vawsaw pyakunaw um vae khyh zah, mih riathae hae paw tuh a haeung vae hae.

¹⁸Tuin kya tuh thongccah hae paw mah daebabi lan pynkheihlan a um hae; ryalaw a nawtu hae paw roi kha thae vae khyh hae.

¹⁹Tuin kya ccungccaw adih ale um hae zah, see hae tuh mih bawi hae kuih kyate a lue vae hae.

²⁰“Pawccemou riathaenaw a teingpaw kha awnaw pya zah, thinlung ngaethahpaw kha hiinnaw a pya?

²¹Chi a ry hae zemah chinaw nynh a thuanua lei hae paw, thuruhpaw sisua laeze chinaw a ryhua hae paw,

²²shawku he a muih hae te, myaryamaw mih lungtua zah, mih lungpaw hae paw kha pawccemou hiinnaw a pya hae?

²³Laanpi a muihkuh kho leipaw, Pachia nynh phang a koihkhawpaw kha pawccemou awnaw pya athua?

²⁴Pawccecize ka hawkhaekunaw tuh ka looh hawte thua zah, ka raw ka khuinaw tuh tui hawte alua.

²⁵Ka thinphangpaw uccaw nynh ka tungvaw yn thuanua zah, ka ripaw uccaw nynh yn ccawphu.

²⁶Ngaengannaw ka hoi khyh, daebabi lan ka um kho khyh; thawdangnaw hoi leite vawsawnaw nynh yn thuanua,” a ci.