Read Zotung Chin JOB 31 Bible Online

JOB 31 - Zotung Chin bible

JOB 31

¹Ka mit te byakinkunaw kae rae vae, tukeiccuze pawtemou liaccady tuh ka do kho ung cih?

²Luki lang e Pachia kyate ka ccou lanpaw tuh pawmou athua cih? Ahangnaw umpaw Athunghuapaw kyate ka rho tuh pawmou athua cih?

³Vawsawnawpi nynh a ding lei hae paw kha thuanua khyh hae tou? ronaw nynh hoyleinaw a rae hae paw kha thuanua khyh hae tou?

⁴Pachia nynh ka ccianaw laanpi kha phe a muih khaw? Ka ccu ka kawpaw balyn kha phe a ria khaw?

⁵“Hynnaw laanpi ka zui zah, ka ccu nynh ling lan a rangsaku lanze,

⁶ahmepaw akhin te kae kha khin ka thua sah lah, Pachia nynh ka dingnaw kha nyh vae sah!

⁷Ka ccu nynh laante lang a cciasei ze thuasah, ka thinlung nynh ka mit rynaw kha a zui ze thuasah, ka kuih kya athupaw a beku ze thuasah

⁸ccacii ka tupaw athae kha milae nynh ae sah lah, kamaw hanlan yn popaw aku kha poh khaee thua sah.

⁹“Ka thinlung kha milae zu nynh yn soihku ze thuasah, ka innpaw a thuakaw kyakhe rekute ka buhkhaw ze thuasah

¹⁰ka zu nynh milae sung kha suhpah sah lah, milae nynh ka zu vawlan a ccu kawraw sah.

¹¹Tuhcihawpaw tuh myarya nungsikuhpaw seinaw thua zah, detah lanpaw seinaw nynh thua;

¹²tuhcihawpaw seinaw tuh phe ccung mamia lang a upaw maee thua zah, ka hoipaw balyn kha khaleih thang lan a upaw maee nynh thua.

¹³“Ka seenung nynh thuasah, ka seepaw nynh thuasah ka tungvaw byalungnaw hoi hae zah, mih bya kha ka ngaepya khyh hae ze,

¹⁴Pachia he yn thokuh te, pawtemou ka cyih cih? Akaw-aleih he yn khialia te, pawtemou ka khung cih?

¹⁵Vue lungkhu kya yn raetupaw nynh minmin kha so rae khyh hae tou? Ccangkheit kyalyapaw Pachia nynh aening kha vue kya oun rae kalang khyh tou?

¹⁶“Ryachipaw nynh a rypaw hankhakheit kha pya leite ka um boi zawtou? Nomae hae mit kha ka rosah boi zawtou?

¹⁷ngawraw hae kha aesah bua leite ka makhae kyalya te ka ae boi zawtou?

¹⁸pawccecize ka di lya mawte ngawraw hae kha paaw hawte ka do-oih hae zah, ka pui takaw mawte nomae hae kha ka bawm hae,

¹⁹boeining a hoi khyh keiccuze a chihpaw lukhakheit kha ka muih ze thuasah, bongkupaw a hoi leipaw ryachipaw kha ka muih ze thuasah,

²⁰ka tuuming te a khualung khyh zah, a khuacci keiccuze hythua yn pya khyh ze thuasah,

²¹byapiazung kya bawmtu ka hoipaw kha ka nyku keiccuze ngawraw tungvaw ka kuih ka hangnua ze thuasah,

²²ka kuihbaw tuh ka raw kyate ccah sah lah, ka kuih tuh atungkunaw kyate thoh khya sah.

²³Pawccecize kae tuh Pachia kya-e vawsawnaw kha ka rih zah, a lesaenaw kha ka hawilia ngan khyh.

²⁴“Sui kha ka doliakuh zah, sui ccipaw tuh ka khynnaw nynh thua ka ci ze thuasah,

²⁵ka hoirumnaw tuh lung zah, ka kuih nynh pataepi a muethya keiccuze ka lungtua ze thuasah,

²⁶khuanin he apaw vae ze khuanin kha ka do zah, phu-enawte a cceih cciamangpaw sawpaw kha he ka do vae ze,

²⁷tuh-e hae nynh ka thinlung kha aruh lante yn soih hae zah, tuh-e hae tuh sawtuanaw pyate ka mung nynh ka kuih kha a myng ze thuasah,

²⁸e hae hynh byapiatu nynh de a tah lanpaw hoyleinaw nynh thua, pawccecize luki lang e Pachia kha vuapaw nynh thua.

²⁹“Kae yn huapaw nynh vawsaw a teing vae ze ka lungtua zawtou? Hoyleinaw a tung vae ze ka lungtua zawtou?

³⁰A hiinnaw kha thyalawte ka mung kha seinaw ka raesah khyh.

³¹Ka innbyn hae nynh, ‘A saw kha kae byn ravo nyn!’ cite ho boi khyh hae,

³²khuaccong hae paw hanlan ka thuakaw kha ka hungpah hae zah, mikhia hae tuh laanpi kya rya boi khyh hae;

³³Zapi patae raw kha ka rih zah, phin kae lokuh hae paw nynh saryakunaw kha ka thinphang keiccuze, ka hoyleinaw kha ka by kya thuruhte, ming hae nynh a cyi hae hawte ka cyiseimenaw kha ka phei boi zawtou? Inn atolang pou leite daetedae lan ka um boi zawtou?

³⁵Lukhakheit nynh ka bya hynh yn thaepah vae sah! (Ka kinkupaw bya miakaw akyh cinawpaw hein kya ka minthuh a um! Athunghuapaw nynh yn leih vae sah!) Yn rawsetupaw nynh sei yn benawpaw ccaw kha zei vae sah!

³⁶Thanccingte tuh-e ccaw tuh ka raw kya ka khangkuh cih, bawilukhung hawte ka khungkuh cih;

³⁷Ka cyisahnaw balyn kha amaw kya ka hopah cih; siapharan ccapaw kha naenuaku hawte amaw kha ka naenuakuh cih.

³⁸Ka laephi nynh kae kha rawsete sia zah, tuh-e laephi kya leithuenaw aringkuhpaw hae nynh mah pynkheihlan a rawkhae hae ze thuasah,

³⁹amee pya leite laephi kyate a poupaw kha ka la ae zah, a hoitu hae kha vawsawnaw ka la pya hae ze thuasah,

⁴⁰chanvuih ku hanpaw hinpaw ku kha po sah lah, barli ku hanpaw lonua kha po vae sah,” a ci. Job bya tuh athang.