Read Zotung Chin JOB 32 Bible Online

JOB 32 - Zotung Chin bible

JOB 32

¹Job nynh amaw mitmuihnaw kya ka ding a ciku keiccuze khah-e lu thum hae nynh Job kha byakhung leite zya a dae hae.

²Tetuh Buz phin, Ram ciihan athuapaw, Barakhel ccapaw Elihu tuh a thinria. Job nynh Pachia laeze amaw kha a dingsahku hua keiccuze Job tungvaw a thinria;

³Job ban hae lu thum tungvaw mah a thinria, pawccecize minmin nynh Job kha na sei a cipya hae zemah, byakhungnaw nykuh khyh hae.

⁴Minmin tuh Elihu laeze a tawccawhua hae keiccuze, aning nynh Job kalan bya hopya lanpaw kha a ngaw.

⁵Thuasalama lu thum hae nynh khungru lanpaw bya a nyku khyh hae paw kha he a nyh tuh a thinria.

⁶Buz phin, Barakhel ccapaw Elihu nynh khung hae zah: “Kae tuh akum nopaw ka thua zah, nanning tuh kum tang hae paw nynh na thua oh; tukeiccuze nanning kalan ka tuanaw ho lan ka rih zah ka rawthah.

⁷‘Kum tang hae paw nynh ho hae sah, kum patae mih she sae vae hae paw nynh tuh hawnaw kha a la ccangku lan hae paw nynh thua,’ cite ka ciku.

⁸Thuasalama ccungccaw kya muisaw um zah, Athunghuapaw hy nynh nythyanaw kha a pya.

⁹A taw hae paw kyalya hynh a haw hae paw thua khyh hae zah, kum tang hae paw kyalya nynh ahmepaw kha nyh khyh hae.

¹⁰Tukeiccuze, ‘Ka bya yn ngaepya tua oh; ka tuanaw kae hotua hin sah,’ ka cipya hae.

¹¹“Ho lanpaw bya na tuaku cciamang lya oh khe, nae hawnaw bya kha ka ngae zah, nae bya kha ka ngaw.

¹²Pekite ka ngae salamah, lu kheit nynh sanmah Job kha bya na ei kho khyh oh zah, Job bya kha na khung kho khyh oh.

¹³Tukeiccuze, ‘Hawnaw kae muih vae, cih nan oh; ccungccaw nynh thua leite Pachia nynh Job kha a tae cih,’ cite ho nan oh.

¹⁴Job nynh kae kha rawsete byaho khyh, nanning nynh bya na khung oh hawte kae nynh tuh ka khung lan khyh.

¹⁵“Minmin tuh mih lungroh zah byakhungru leite a um hae; byaho lanpaw hoi vae khyh hae.

¹⁶Minmin nynh khungru leite phang thadyn hae zah, bya a ho khyh hae keiccuze ka ngaw cih hae tou?

¹⁷Kae zemah bya ka khungru cih hae; ka tuanaw kha ka hobua cih;

¹⁸Pawccecize ho lanpaw bya patae ka hoi; ka lungkhu e muisaw nynh byaho lan thawte yn tuhou.

¹⁹Ka thinlung tuh pounaw a hoi leipaw misutui te lokuh zah, vyavya pawkhaekuhpaw misutui-saphuabawng athawpaw te nynh aloku.

²⁰Ka lungdae nawlan ka ho hahe cih; ka khalang ka aw cih zah ka khungru cih.

²¹Humhung mae mah ka do lan khyh, humhung kya mah maemuihtangnaw bya ka ho lan khyh.

²²Pawccecize pawtemou maemuihtang byaho lan cipaw ka nykuh khyh, tuhte ka la cyi lanze, yn Raetupaw nynh aro mawze ka ccyh yn thangsah sei cih!