Read Zotung Chin JOB 33 Bible Online

JOB 33 - Zotung Chin bible

JOB 33

¹“Pou Job, atu ka hopaw hynh thae lah, ka bya balyn hynh ngaetua.

²Dotua, ka khalang ka aw zah, ka khalang lungkhu umpaw ka lae nynh bya a ho.

³Ka thinlung a dingnaw kong kha ka bya nynh a langsaku, ka nypaw kha ka mung nynh hmerarih lan a ho.

⁴Pachia muisaw nynh kae kha yn rae vae, Athunghuapaw kya-e hy nynh hiinnaw yn pya.

⁵Bya nae khung kho ze yn khungtua; ka malang hin thadyn lah, na bya kha hoyte paccynku tua,

⁶Pachia malang tuh kae mah nang hawte nynh ka thua; kae hynh mah anglae te raepaw nynh ka thua.

⁷Ka raw nae rinaw nynh na thin ae phangsah nan sah; kae nangsepaw bya hynh na tungvaw kya ri lan khyh.

⁸“Thanccingte, ka thaenaw khe phe na ho vae zah, na hopaw roi kha phe ka thae vae.

⁹‘Ka thyaa, ka cyiseipaw um khyh; a thyaapaw ka thua zah, ka tungvaw hoyleinaw um khyh.

¹⁰Pachia nynh ka cyiseinaw kha yn ccungpah zah, kae kha a rhaw lang yn ria;

¹¹ka ccu kha sivawrui te yn khii zah, ka ccianaw takyh yn rin,’ na ci.

¹²“Thuasalama e kya nang tuh na sei. Bya kae khungru cih: Pachia tuh ccungccaw laeze a lesaehua.

¹³Pawccemou Pachia kha na rawse zah, ‘Pachia nynh ka bya kha yn khungru khyh,’ na ci?

¹⁴Ccungccaw nynh a thaethya khyh zemah, Pachia nynh atu phuinccang, nyalang phuinccangte a ho.

¹⁵Ccungccaw hae nynh mih ikhung vawlan thuhbabu lan a i lya hae khe, mih maan kya, khuazi vizin kyakhe,

¹⁶Pachia nynh mih nakaring kha uasah zah, raeringnaw pyate a risah hae.

¹⁷Tuh-e tuh Pachia nynh ccungccaw hae kha mih cyisahnaw kyate maeleihsaku khylan, lysakunaw kyate thungkhaw khylan,

¹⁸mih muisaw kha Michi khua kyate luesah khylan te chinaw Vawpi zuanaw kyate mih hiinnaw kha haang khylan nynh thua.

¹⁹Minmin kha mih ikhung vawlan khe ccinaw te detah thua hae zah, mih ru kha palei ccisah athua;

²⁰tuhteze nynh mih hiinnaw nynh sanlou kha hua zah, looh athuapaw kha ae ry khyh hae.

²¹Mih ngesaw tuh myaryamaw thah zah, muih boi leipaw mih ru hae tuh oun langkuh vae hae.

²²Mih muisaw tuh Michi khua lang naekuh vae zah, mih hiinnaw tuh chinaw a thuakhae hae paw kalan a naekuh vae.

²³Thuasalama minmin laku e lu kheit hanlan vaaw ccungccapaw lu kheit, hopiatu lu kheit, thong kheit kyaze lu kheit, ccungccaw dingnaw a siakhaepaw um zah,

²⁴aning tungvaw thawccinaw a hoipaw vaaw ccungccapaw nynh, ‘Michi khua lang a ccia khyh nawlan, amaw kha luesah tua; aning sawkhawnawpaw kha phe ka muih vae;

²⁵a ngesaw tuh ngeno ngesaw lang tang sah lah, a ngawphue lya thawzung a hoi lya hawte thuathui vae sah,’ a ci.

²⁶Te Pachia kalan sawsang zah Pachia nynh a ccoupya, Pachia malang khe lungtuate langkuh zah, Pachia nynh a dingnaw hanlan a sangru.

²⁷Tuh-e ccungccapaw nynh ming hae kyakhe hlawsah zah, ‘Kae tuh ka sei, dingnaw kyate ka cceihsei, thuasalama tuh-e seinaw mee kha ka teing khyh.

²⁸Michi khua lang ccianaw kyate ka muisaw kha yn shawkhaw vae zah, ka hiinnaw nynh awnaw kha a muih cih,’ a ci.

²⁹“E hae balyn hynh Pachia nynh ccungccaw hae kya atu te atu a cyi ccaccing,

³⁰ccungccaw hae nynh hiinnaw kya-e awnaw kha a muih kho nawlan hae, mih muisaw kha Michi khua kyate a kikhae.

³¹Job, ka bya hynh pekite yn ngaepya tua, daetedae lan umtua, bya ka ho cih.

³²Ho lanpaw hankhakheit na hoi ze, bya yn khungtua; nang kha thyaaccousah lan kae ry keiccuze bya hotua.

³³Ho lanpaw na hoi khyh ze, ka bya yn ngaepya tua; daetedae lan umtua, hawnaw kha kae ccangpah cih,” a ci.