Read Zotung Chin JOB 34 Bible Online

JOB 34 - Zotung Chin bible

JOB 34

¹Oute Elihu nynh bya po ho zah:

²“A haw hae paw nanning, ka bya hynh ngaetua oh, nythyanaw a hoi hae paw nanning, nae nakaring kha ka kalan oun tuaku tua oh;

³dankhaling nynh looh kha a taangtua hawte, nakaring nynh bya kha a syntawtua.

⁴Byading kha pokuh oh sih lah, aening laku kya ahoy lante byapae oh sih.

⁵Pawccecize Job nynh, ‘Kae tuh seinaw hoi leipaw nynh ka thua, Pachia nynh ka dingnaw kha ccaring yn lawpya vae;

⁶ka la ding zemah mihynpaw lang ria ka thua vae; ka la cyisei khyh zemah ka vaemaw tuh dansah kho leipaw nynh thua,’ a ci.

⁷Job te alokuhpaw hummou a um? Saryanaw kha tui hawte neih zah,

⁸hoyleinaw a rae hae paw ryte mungkute, ccungccaw hoylei hae paw ryte a cceihkheih hae paw tuh hummou?

⁹Pawccecize Job nynh, ‘Pachia tungvaw lungrythua tuh thanenaw um khyh,’ a ci.

¹⁰“Tukeiccuze nythyanaw a hoi hae paw nanning, ka bya hynh ngaetua oh, Hoyleinaw tuh Pachia kyate sawkuh sah lah, cyiseinaw tuh Athunghuapaw kyate sawkuh vae sah.

¹¹Ccungccaw hae kha mih cyisahnaw thyhte a liaru cih hae zah, mih ziazae thyhte mih tungvaw a ccawsah cih.

¹²Thanccingte, Pachia nynh hoyleinaw kha rae lan khyh zah, Athunghuapaw nynh dingnaw kyate maekuh lan khyh.

¹³Hum nynh mou laephi hynh Pachia kya ap zah, hum nynh mou laephipi hynh amaw tungvaw a khang?

¹⁴Pachia nynh ccungccaw muisaw kha amaw kalan lahthui zah, a hy kha amaw kalan a law lanze,

¹⁵ahysuepaw balyn tuh marya a roh cih hae zah, ccungccaw balyn tuh laenoi kalan a ki cih hae.

¹⁶“Nythyanaw na hoi ze, e hynh thaetua; ka hopaw hynh ngaetua.

¹⁷Dingnaw a huatupaw nynh a uk cih tou? Adingpaw te athungpaw kha sei na be cih tou?

¹⁸Aning nynh siapharan kha, ‘Nang tuh na hynpaw!’ ci zah, uktu hae kha, ‘Ccungccaw hoy lei hae nanning!’ a cipya hae;

¹⁹bawi hae tungvaw maedonaw hoi khyh, ryachi hae kya laeze mihoi hae tungvaw kya maedonaw hoi khyh; pawccecize minmin balyn tuh Pachia kuih te raepaw nynh thua hae.

²⁰Sosoh taraw kyakhe a chih hae; ccungccaw hae tuh ziraccyng khe thyngkuh hae zah a chih hae, athung hae paw mah ccungccaw kuih te thua leite a zo hae.

²¹“Pawccecize Pachia nynh ccungccaw ccianaw laanpi kha do zah, mih ccu a kaw hae paw balyn kha a muih.

²²Hoyleinaw a rae hae paw nynh rekunaw lanpaw mohnaw um khyh zah, chinaw mynlyh mah um khyh.

²³Pachia malang byapiakunaw ccyh kha, ccungccaw hanlan Pachia nynh khyapah khyh.

²⁴Athawsae hae paw kha akaw-aleih khia leite syro hae zah, mih umnaw kyakhe mingccang hae kha a nung hae.

²⁵Tuhcite mih cyisahnaw kha nyh zah, khuazi khe minmin kha khulia hae zah a ro hae.

²⁶Mih hoyleinaw keiccuze ccungccaw hae muihnaw kyakhe minmin kha a zia hae,

²⁷pawccecize minmin nynh amaw kyate ccanglang maekuh hae zah, a laanpi miakaw kha pawlangria khyh hae,

²⁸tetuh ryachi hae siaruanaw tuh amaw kya thua zah, tuaasahkunaw a teing hae paw siaruanaw kha a thaepya hae.

²⁹Pachia nynh yccae leite zya a um zeso, hum nynh mou amaw kha seibe kho cih? A mae kha zya a reku ze, minphuin nynh thuasah, lukhakheit nynh thuasah, hum nynh mou amaw kha a muih kho cih?

³⁰Tuhteze nynh Pachia nyh lei hae paw nynh thuasah, ccungccaw hae kha kaangsyakhawtu hae nynh thuasah uk lan khyh hae.

³¹“ ‘Detahnaw phe ka teing vae; bua ka sei vae lan khyh;

³²ka ny leipaw kha beih yn ccangpah; hoyleinaw kha ka la rae vae lanze, bua ka rae vae lan khyh,’ cite lukhakheit nynh Pachia kha a hopya vae khaw?

³³Amaw kha na vua keiccuze, na rynaw thyhte ae liaru cih tou? Kae nynh thua leite, namaw nynh na poku lanpaw nynh thua; tukeiccuze na nypaw kha hotua.

³⁴Tuanaw a hoi hae paw nynh hynhcite yn hopah cih hae zah, ka bya a thae hae paw mihaw hae nynh hynhcite a ho cih hae,

³⁵‘Job nynh nythya leite a ho, a bya tuh hawnaw leite hopaw bya nynh thua,’ a ci cih hae.

³⁶Job nynh ccungccaw hoylei hae paw hawte bya a ho keiccuze athangnaw cia syntawtua thua vae sah.

³⁷Pawccecize a seinaw kyakhe rawsenaw a biachih, aening laku kya a kuihbia zah, Pachia rawsenaw bya kha patae a ho,” a ci.