Read Zotung Chin JOB 35 Bible Online

JOB 35 - Zotung Chin bible

JOB 35

¹Elihu nynh po ho zah:

²“Nang nynh, ‘Pachia malang ka ding,’ na cipaw hynh akyh cite na tua tou?

³Nang nynh, ‘Paw thanenaw mou ka mue? Sei leite ka la um zeso pawmou ka mue cih?’ na ciku.

⁴Nang te na ban hae kha bya kae khungru cih oh.

⁵Vaawlui khuh do lah, muihtua; nang laeze ahang huapaw maeking hae khuh dotua.

⁶Na la sei lanze amaw rawsete pawmou na cyi kho? Te na cyiseimenaw alung zemah, a tungvaw pawmou na cyi kho?

⁷Na ding zeso, Pachia kha pawmou na pya kho? Aning nynh na kuih kyate pawmou a mue?

⁸Na hoyleinaw nynh namaw tahawpaw milae kyalya kha a teingsah hae, na dingnaw nynh mah mingccang hae kyalya kha thanenaw a pya hae.

⁹“Tuaasahkunaw myarya alung keiccuze ccungccaw hae tuh a siarua hae; athawsaepaw ccungccaw hae kuih keiccuze minmin tuh bawmnaw ngiakute a sia hae.

¹⁰Thuasalama, ‘Yn Raetupaw Pachia, khuazi kya thawzung yn pyatupaw,

¹¹laephi vaw e sarangpaw hae laeze oun ccangpah hua zah, vaawlang e pavaw hae laeze ahawhua lante oun raetupaw tuh teimou a um?’ cite lu kheit nynh sanmah ho khyh.

¹²Minmin tuh hoyleinaw raete a lysakuh hae paw athua hae keiccuze, a siarua hae zemah Pachia nynh khungru khyh hae.

¹³Pachia nynh sia huatawpaw kha thae khyh, Athunghuapaw nynh khah-e kha pawlangria khyh.

¹⁴‘Pachia kha ka muih khyh,’ he na ci vae ze, na byathan tuh amaw malang a um keiccuze amaw kha ngaehoiku tua!

¹⁵Te atu, Pachia thinrianaw nynh ccungccaw kha detah khyh zah, cyiseinaw kha thawte pawlang a ria khyh keiccuze,

¹⁶Job nynh accakaepaw bya kha hote a khalang kha a aw, nythyanaw hoi leite bya patae a ho,” a ci.