Read Zotung Chin JOB 36 Bible Online

JOB 36 - Zotung Chin bible

JOB 36

¹Elihu nynh a bya kha po pia zah:

²“Ccapyhtari yn ngaesangpah lah, nang kha kae muihsah cih, pawccecize Pachia ccelang ho lanpaw ka hoi ung.

³Asawnaw langte ka hawnaw kha kae thuakhae cih zah, kae yn Raetupaw tuh a ding cipaw ka langsakuh cih.

⁴Pawccecize ahme leipaw bya ka ho ccaccing khyh; nynaw te phe accingpaw ccungccaw tuh na kya phang a um.

⁵“Accaccingte, Pachia tuh athungpaw thua zah, humhung kha mah dothatheih khyh; aning tuh hawnaw, thawzung te phe abeih.

⁶Ccungccaw hoylei hae paw hiinnaw kha haang khyh, thuasalama vawsawnaw a teing hae paw nynh mue lan a ccan hae paw kha a pya hae.

⁷Miding hae kyate a mit kha ccanglang hawitaw khyh hae, minmin kha bawitungkhung vawlan e siapharan hae ryte zungzae umsah kheih hae zah, minmin kha a hangthung hae.

⁸Te minmin kha sivawrui te khii thua hae zah, vawsawnaw arui te khii athua hae ze,

⁹Pachia nynh mih ryalawnaw kha thuasah, lysakute a cyiseimenaw hae kha thuasah a langsapyaku hae.

¹⁰Thuiheinaw thae ry nawlan mih nakaring kha uasah hae zah, hoyleinaw kyate a maeleihku nawlan hae kaw a pya hae.

¹¹Pachia bya ngae hae zah a rya a law hae ze, mih nin kha hoirumnaw te thangsah hae zah, mih kum kha lungtuanaw te a thangsah hae.

¹²Thuasalama kaw a ngae khyh hae zetuh, thaloi rhaw te a chih cih hae zah, nythyanaw hoi leite a chih cih hae.

¹³“Pachia nyh lei hae paw nynh thinrianaw kha a ry hae; Pachia nynh minmin kha he a khiide hae te, bawmnaw mue khylan sia khyh hae.

¹⁴A zawthaw lya hae khe chih hae zah, mih hiinnaw tuh maethyanaw te athang.

¹⁵Vawsawnaw a teing hae paw kha mih vawsawnaw toulou mawkhate luesah hae zah, mih nakaring kha riathaenaw khate a uasahpya hae.

¹⁶Nang zemah riathaenaw hmin kyate kheekunaw a um leinaw akopaw hmin kalan ae soih, te na ccaboi vawlan khe aepaw niapaw te phe abeih.

¹⁷“Thuasalama ccungccaw hoylei hae paw nynh a ing hae paw kha na ing; na seinaw te atekuhpaw detahnaw kha na ing.

¹⁸Thinrianaw nynh dothatheihkunaw mue khylan ae soih khyh nawlan raeringkuh lah, myarya lepaw shawkhawnawpaw nynh nang kha ccanglang ae maeleih nan sah.

¹⁹Na rawnaw nynh riathaenaw kyate ae thungkhaw cih tou? Na thawzung thungnaw balyn nynh so ae thungkhaw cih tou?

²⁰Ccungccaw hae kha mih umnaw kya ro athua ccyh hae khuazi kha ngae nan.

²¹Raeringkuh! Hoyleinaw kalan maekuh nan; pawccecize tuh-e hoyleinaw keiccuze vawsawnaw khate syntawtua na thua vae.

²²Dotua, Pachia tuh a huhan liate hangthung athua vae; Pachia te alokuhpaw sazae hummou a um?

²³Hum nynh mou Pachia laanpi kha synriapah zah, hum nynh mou, ‘Phe na cyisei vae’ cite a hopah kho?

²⁴“Ccungccaw hae nynh hlawsah te a thehoysah hae paw a ryalaw thehoysah lanpaw kha la ning nan.

²⁵Ccungccaw balyn nynh a ryalaw kha a muih vae hae; ccungccaw miakaw nynh asawnaw te a dolang hae.

²⁶Accaccingte, Pachia tuh lesae zah amaw kha ah nyh kho khyh oh; Pachia kum tuh riatae um khyh.

²⁷Dangdy tui kha palung lang suethung zah, a tuihu kha khuaa lang a rawsah,

²⁸vaawlui kyate khuaarah zah, ccungccaw hae tungvaw khe thawte khuaa arah.

²⁹Hum nynh mou maeking adawkuhpaw kha nyhthya zah, a umnaw kya-e kholungthyhpaw kha a nyhthya?

³⁰Dotua, a pepan khe a awnaw kha pazaesakuh zah, rili kaw akhu huanaw kha mah phe a bong.

³¹Tuhcite ccungccaw hae kha uk hae zah, looh patae a pya hae.

³²A kuih te khozawlaekuhpaw kha kyng zah, a eenaw kha tungsah lan kaw a pya.

³³Kholungthyhpaw nynh khise yn tho lanpaw kha langsah zah, vaetua hae nynh mah khise yn tho lanpaw kha a ny hae.