Read Zotung Chin JOB 37 Bible Online

JOB 37 - Zotung Chin bible

JOB 37

¹“E kong keiccuze ka bung sohkuh zah, a umnaw hmin kyate a thohkuh.

²Kholungthyhpaw Pachia roi te a khalang kyate yn ccaepaw roi kha ngaetua oh.

³Vaawlui zakaw balyn kya kholungthyhsah zah, laephi apaki hae kyacia a khozaw kha a laesahku.

⁴Tukoute Pachia roi accae; alesaepaw a roi kha kholung lang thyhsah zah, a roi thae athua lyakhe khozawlaekunaw kha khee khyh.

⁵Pachia nynh ngaeangthua lan um lante a roi kha kholung lang a thyhsah; aening nynh ah ny kho lei oh paw uccaw myarya lepaw kha a rae.

⁶Pawccecize aning nynh vuiraw kha, ‘Laephi vawlan ccah,’ a cipya; pharyphary rahpaw khuaa kha, ‘Myarya ccan lan rah,’ a cipya.

⁷A raepaw ccungccaw balyn nynh a ryalaw kha a ny nawlan hae, ccungccaw miakaw mih ryalaw kha a haeungsah hae.

⁸Tetuh sarangpaw hae tuh mih karung lungkhu lang tee hae zah, tuin kyakhe zya a um hae.

⁹Alia langte khiccung tuh yn khia, palung lang e khisan nynh akyaapaw kha yn thuakhae.

¹⁰Pachia hy nynh tuiting kha umsah zah, kobalaepaw tui tuh tuiting lang a tang.

¹¹Maeking phang zipaw kyakhe tuihu kha nung zah maeking hae nynh a awnaw kha a pazaesaku hae.

¹²Pachia nynh kaw a pya hae thyhte, laephi pynpi vawlan a um nawlan hae, amaw khuakhannaw thyhte voilute a nuekuh hae.

¹³Thuihei nawlan tou, athua khyhze a ram hoy nawlan tou, athua khyhze a sungsahnaw langsaku nawlan tou, Pachia nynh tuh-e tuh a cyisaku.

¹⁴“Pou Job, e bya hynh thaetua; zya um lah, ngaeangthua lan umpaw Pachia ryalawnaw hae kha tuatua.

¹⁵Pachia nynh minmin tungvaw pawtemou kawpya hae zah, a maeking kya-e awnaw kha pawtemou a awsah cipaw na nyh tou?

¹⁶Maeking hae nynh a umthya hae paw kha na nyh tou? a thyahawnaw phe ccingpaw Pachia ryalawnaw ngaeangthua lan um hae paw kha na nyh tou?

¹⁷Alia lang e khisan keiccuze laephi tuh he aso vae ze, na boeining hae kha pawtemou aso cipaw na nyh tou?

¹⁸Laeepaw muinsado hawte atangpaw vaawlui kha Pachia nynh a dawsaku hawte na dawsakuh kho tou?

¹⁹Amaw kalan kae ho lanpaw kha oun ccangpya tua; kae thinlung amoh keiccuze kae byathan kya ho lanpaw kae nykuh kho khyh.

²⁰Ka ho rypaw bya kha Pachia kalan hopya lan accan zawtou? Po laangku lan a rypaw a um boi zawtou?

²¹Khisan nynh po zaw zah vaawlui kha he a thyaasah te, vaawlui kya-e awnaw kha humhung nynh mah do ngan khyh.

²²Palung langte sui awnaw yn langkuh, Pachia tuh sawtua lan umpaw lesaenaw te phe abeih.

²³Athunghuapaw kha aening nynh ah muih kho khyh oh; aning tuh huhan te thuasah, byading te thuasah myarya alesaepaw nynh thua, myarya a dingpaw thua zah ccungccaw tungvaw reisakuh lan khyh.

²⁴Tukeiccuze ccungccaw hae nynh amaw kha a ri hae; lysakute a hawsakuh hae paw miakaw kha pawlangria khyh hae,” a ci.