Read Zotung Chin JOB 38 Bible Online

JOB 38 - Zotung Chin bible

JOB 38

¹Te BAWIPAW nynh Job kha khiccung lungkhu te byakhung zah:

²“Nynaw a um leipaw bya te ka paccynnaw a mohsahpaw hynh hummou athua?

³Pise a zaw vae paw hawte na taevoiboei kha voiku tua, bya kae khia cih zah nae khungru cih.

⁴“Laephi thotakawnaw ka la rae lya kha teimou na um? Na ny ze yn hopya tua.

⁵Laephi ako aby hynh hum nynh mou byapae? Na ny ccaccing aho! Tuhkhyhze laephi vawlan tounawpaw rui kha hum nynh mou a raw?

⁶Laephi aleihpaw tuh paw vawlan mou abingku? Tuhkhyhze awkhua takaw e awsi hae tuh pynkheihlan hlawsah hae zah,

⁷vaawccungccaw balyn tuh lungtuate a sia lya hae khe, laephi apaki lang e abyapi huapaw lung kha hum nynh mou a bing?

⁸“Rili hynh a nung vue kyate he yn pui lya kha, hum nynh mou rili kha thuakaw te a khawsung?

⁹Rili a boeining lang maeking kha ka raepah zah, lungde nawlan marae zipingpaw mohnaw kha ka raepya lyakhe,

¹⁰rili hanlan ramri ka nungpya, te accaw hae te thuakaw hae kha ka nungpah zah,

¹¹‘E kyacia nae thua cih, e kya alawe lan nae cceih lan khyh, alysakuhpaw na tuileih hae tuh e kyahin athang cih hae,’ ka cipya.

¹²“Na pui takaw te awkhua ccyh kha kaw na pya boi tou? Awkhua takaw kha a umnaw hmin na nysah boi tou?

¹³Awkhua takaw e awnaw nynh laephi apaki kha kyng zah, ccungccaw hoylei hae paw kha laephi kyate dae thui lan vua athua nawlan hae, awkhua takaw kha kaw na pya boi tou?

¹⁴Tazeihtung te dydepaw anglae hawte rulaekuh zah, boeining hawte azong so athua.

¹⁵Ccungccaw hoylei hae paw hanlan awnaw tuh khee thua zah, a hangthung hae paw mih kuih tuh akhya.

¹⁶“Rili tuidy lungkhu lang na tee boi vae tou? Akhu phe adianaw hmin kya so na khiakuh boi vae tou?

¹⁷Chinaw koikua kha langsapyaku na thua vae tou? marae zipingpaw mohnaw koikua kha na muih boi vae tou?

¹⁸Laephi pynpi ako zia hynh na nyhthya tou? E balyn hynh na ny zetuh hotua.

¹⁹“Awnaw a umnaw hmin kalan ccianawpaw laanpi tuh teimou a um? mohnaw hmin so teimou a um?

²⁰Nang nynh awnaw te mohnaw kha a phiakunaw hae ramri kalan na cciakhae kho hae tou? mih umnaw inn lang cceihpaw laanpi kha na nyh kho tou?

²¹Nang tuh langmawlya na la pui vae paw zah, na nyh sasaw cih, na she myarya sae vae hynhsa!

²²“Vuiraw ccakhungnaw inn lungkhu lang na tee boi tou? Hya ccakhungnaw inn kha na muih boi tou?

²³Khah-e hae kha vawsawnaw nin hanlan te rhawtukkunaw te doukunaw nin hanlan taekhiate ka nung hae.

²⁴Awnaw hynh pawcihawpaw laanpi kyate mou yn phiaku? Nithua lang e khisan hynh pawcihawpaw laanpi kyate mou laephi vawlan a zaw?

²⁵“Ccungccaw um leinaw ram kya te ccungccaw um leinaw laesia ram kya khuaarawsah khylan hum nynh mou khuaa accanpaw hanlan tuizy zypah zah, riakawnaw laanpi kha so a raepah?

²⁷Ramrou te ccungccaw um leinaw ram kya tui bynsah khylan te laephi kyate lonua posah khylan hum nynh mou tui a bu?

²⁸“Khuaatui nynh paaw a hoi tou? Hum nynh mou dangtui accawpaw hynh a umsah?

²⁹Tuiting hynh hum vue kyate mou yn pou? Vaawlang e dangtui hynh hum nynh mou a saah?

³⁰Tui tuh lung hawte tang zah, rili vawlan e tui tuh ahaw.

³¹“Awsitaruh arui kha na khiide kho tou? Orion awsiphu kya-e arui kha na phou kho tou?

³²Mazzaroth awsi hae kha mimaw ccyh azaw khe na langsakuh kho hae tou? Awsipi kha a taw hae ryte na cciakhae kho hae tou?

³³Vaawlui phungzae hae kha na nyh tou? Tuh-e phungzae hae uknaw tuh laephi vawlan na rae kho tou?

³⁴“Tui alepaw nynh nang kha ae vu ccaw cite, maeking hae kalan roi na saw kho tou?

³⁵Khozaw nynh laekuh zah nang kha, ‘E kya nynh kae um,’ ae cipya nawlan, khozaw kha na laesakuh kho tou?

³⁶Hawnaw kha ccungccaw lungkhu kya hummou a nung kho? Nythyanaw kha ccungccaw thinlung kalan hum nynh mou a pya?

³⁷Maeking rianawpaw hawnaw kha hummou a hoi? Tuhkhyhze laenoi hae tuh sueluakuh hae zah, laephiccan hae tuh pynkheihlan he a beekuh hae te, vaawlui e saphua tui-ung kha hummou a lae kho?

³⁹“Chindeih taw hae nynh mih karung kya a rya lya hae khe, tuhkhyhze thabu kaw kya saw a buhku lya hae khe, chindeih pinung hanlan saw na thuakhaepah kho tou? Tuhkhyhze mih vuelawpaw chindeih taw hae kha mih vue na sosah kho hae tou?

⁴¹Va-aw taw hae tuh aerua a hoi khyh hae keiccuze Pachia kalan sia hae zah, a khiavuiku lya hae khe, hum nynh mou aepaw a pya hae?