Read Zotung Chin JOB 39 Bible Online

JOB 39 - Zotung Chin bible

JOB 39

¹Sathaw hae nynh hohtuh ccyh mou ataw a than hae cipaw na nyh tou? Sazuh nynh a taw thanpaw kha akaw-aleih na nyh tou?

²A taw poi ccyh sawpaw kha na ria kho tou? a taw than ccyh kha na nyh tou?

³Mih taw than khylan a ryakhaeku ccyh hae te mih taw a toiku ccyh kha na nyh tou?

⁴Mih taw hae tuh oun tang hae zah, ramkaw kya oun lethung hae; ccanglang cceih hae zah, mih pi kalan ki vae khyh hae.

⁵“Hum nynh mou ramkaw e lann kha a rythyte ccianaw kaw a pya? Hum nynh mou lann khiinawpaw arui kha a supah?

⁶Ramkaw kha a inn lang ka pya zah, lonua apo leinaw loi ram kha a umnaw hmin lang ka pya vae.

⁷Siarisiarae a umnaw khuapi kha pawlangria khyh zah, ryalaw nawtu hae sianuanaw kha thae khyh.

⁸Mua hae tuh tuh-e lann a paeekunaw hmin thua zah, ahinpaw aku miakaw kha a ccungku.

⁹“Ccungtepaw nynh na rya ae lawpah ry cih tou? Na sahiinkhia kya khuazi a rya ry cih tou?

¹⁰Liarui te khiite lei na thuenah kho cih tou? Tuhkhyhze na nulang zuikute accya kya lei a thue cih tou?

¹¹Ccungtepaw tuh myarya a thawsae keiccuze na doliakuh cih tou? Na ryalaw kha a tungvaw na ap kho cih tou?

¹²Aning nynh yn ki cih zah, na ccathae kha na looh mianawpaw kalan yn thuakhae cih cite na zyn tou?

¹³“Kalauh pavaw tuh a sake ming zya salamah a sake kha thawte a bia.

¹⁴Aning nynh a tui kha laekhu kya cciataw zah, laephi kyakhe so kaleih lan la um hae sah a ci.

¹⁵Ming hae ccu nynh a tui kha a koisei cih, loramsaw nynh a sydesei cih cipaw kha phe a ning.

¹⁶A taw hae kha amaw taw athua lei hae paw hawte, mih tungvaw thawccinaw hoi khyh; a ryalaw kha alakaw lan atangsei cih cipaw a thinphang khyh;

¹⁷pawccecize Pachia nynh kalauh pavaw kha hawnaw a hoi lei lante rae zah, nythyanaw kha pyabua khyh.

¹⁸Myarya ahangnaw kya a sake a daw vae ze, marang te marang a ccikuhpaw kha a nuinse hae.

¹⁹“Marang thawzung kha nang nynh na pya tou? Marang nging kya a sy kha na saesah tou?

²⁰Marang kha tungkhipaw hawte na thohsakuh tou? A naduh kya-e roi tuh ri lan a um.

²¹A ccutin te pue zah, a thawzung kyakhe a lungtuakhaekuh; rhaw hae zunghe te tukku khylan a cceih.

²²Rinaw kha nuinse zah siikuh khyh; thaloi rhaw kha kitaw khyh.

²³Aning kha rawsete the bawng tuh aroi ccae zah, dalahdalah akpaw ccoi te sivaw toikuhpaw ccoi tuh awrarih lan a aw hae.

²⁴Puatho, thinriate laephi kha a laang; mungkae roi a thae tuh daebabi lan um kho khyh.

²⁵Mungkae roi he accae tuh, ‘Alei!’ a ci. Asawnaw kyate rhawmyn kha a thae, rhawbawi hae kya-e kawpya siaruanaw roi kha a thae.

²⁶Mosi nynh ahangnaw kya zou zah, a sake dawte alia lang a zoupaw tuh nang na hawnaw liate tou athua?

²⁷Mosipi nynh palung lang zouthung zah, ahangnaw kya a bu a luakupaw tuh nang nynh kaw na pya keiccu tou athua?

²⁸Aning tuh lungpi vawlan um zah akhynnaw lungpi karynkarenaw kyakhe a bu a luaku.

²⁹Tuin kyate ae lanpaw saw kha a doku; a mit nynh asawnaw kyate saw kha a muih.

³⁰A taw hae nynh chii kha a zu hae; sawchihpaw a umnaw kyakhe khah-e mosipi tuh a um,” a ci.