Read Zotung Chin JOB 4 Bible Online

JOB 4 - Zotung Chin bible

JOB 4

¹Oute Teman minphuinpaw Elifaz nynh byakhung zah:

²“Bya kaw kheit kae hopya ze, na thinria vema? Thuasalama byaho leite hum nynh mou a um kho cih?

³Dotua, ccungccaw patae kha na thuihei vae hae; a thawzyapaw kuih hae kha mih thaw na saesah vae hae.

⁴Na bya nynh vyavya khuliakuh hae paw kha bawm hae zah, nang nynh a thawzyapaw ccukharu hae kha na tynsah hae.

⁵Thuasalama atu tuh vawsawnaw nynh he ae thuanua te, na thindyn zah na lungroh.

⁶Pachia raw na rinaw kha na zynkunaw thua khyh tou? Na hiinzia a ccingnaw kha na ngaehoikunaw thua khyh tou?

⁷“Atu tuatua, ccaenaw um leipaw kha ro athua boi tou? Miding kha vua athua boi tou?

⁸Ka la muih vae hawte, hoyleinaw loo kha pho hae zah, vawsawnaw ccacii a tu hae paw nynh tuh hoyleinaw te vawsawnaw kha a rue hae.

⁹Minmin tuh Pachia hy keiccuze roh hae zah, maee lang ruapaw a thinrianaw keiccuze a chih hae.

¹⁰Chindeih siaruanaw, chindeih arepaw roi dae zah, chindeih taraw a haw tuh khya athua.

¹¹Tei lanpaw saw a um vae khyh keiccuze athungpaw chindeih tuh chih zah, chindeih pinung a taw hae tuh phiariphiarae a um hae.

¹²“Aruh lante ka kalan bya yn thua zah, ka nakaring te zyazya lante ka thae.

¹³Ccungccaw hae tuh thuhbabu lan he a ihtheih hae te, khuazi vizin te ka muihpaw kha ka tua lyakhe,

¹⁴rinaw te thyngkunaw nynh ka tungvaw yn thuanua zah, ka ru balyn pong athyngkuh.

¹⁵Muisaw nynh ka malang khe yn zuake zah zyazyate a cceih; ka ripaw ka ming phe tho.

¹⁶Tuh-e muisaw tuh phang a thadyn ung, thuasalama a muinsan kha ccaerarih lan ka muihthya khyh. Oute ka malang khe muinsan ccangkheit ka muih; daekakinpaw kya-e roi roikheit kha ka thae:

¹⁷‘A chih khopaw ccungccaw hynh Pachia malang a ding kho tou? Ccungccaw hynh a Raetupaw malang a thyaa kho tou?

¹⁸Pachia nynh a ryalahtu hae kha heize zyn kho khyh hae, a vaawccungccaw hae kha heize cyiseinaw a muihpya hae;

¹⁹tuhte athua lanze laephi-inn kya um zah, yn thotakawnaw tuh laenoi athuapaw, laehaw hawte miade azoipaw ccungccaw kha tuh hohcihmou houh zyn lan khyh.

²⁰Awkhua te zete laku mawkhe a rohthya hae; humhung nynh mah ny leite a chihthya he hae.

²¹Mih ryabu-rui kha mih laku kyate thoh paepya thua zah, hawnaw hoi leite a chih hae.’