Read Zotung Chin JOB 40 Bible Online

JOB 40 - Zotung Chin bible

JOB 40

¹Te BAWIPAW nynh Job kyakhe,

²“Pachia kha seinaw a ccungpahtupaw nynh Athunghuapaw kha bya ei lan accan zawtou? Pachia ryte bya a eikuh hae paw nynh bya a khungru cih,” a ci.

³Oute Job nynh BAWIPAW kha khungru zah,

⁴“Kae tuh hosyn leipaw nynh ka thua; nang kha pawtemou kae khungru kho cih? Ka kuih te ka khalang kha ka huku.

⁵Vae kheit phe ka ho vae zah kae khungru vae lan khyh; vae ning ka ho vae zah ka ho vae lan khyh,” a cipya.

⁶Tetuh BAWIPAW nynh Job kha khiccung lungkhu te khungru zah:

⁷Pise hawte na taevoiboei kha voiku tua; Bya kae khia cih zah nae khungru cih.

⁸Kae hynh na sei nae ci ngan cih tou? Nang tuh thyaaccou na thua nawlan, kae hynh sei nae be cih tou?

⁹Pachia kuih te alokuhpaw kuih na hoi tou? Pachia roi te alokuhpaw roi khate khozaw na laesakuh kho tou?

¹⁰Lesaenaw te sawtua ccounaw khate ccaanku tua; phu-enaw te minthaannaw kha boeining lang lawku tua.

¹¹Na thinrianaw kha pousah tua, a lysakuhpaw balyn kha do hae lah, nyaasah bung hae.

¹²A lysakuhpaw balyn kha do hae lah, akaw lang sangsah hae; ccungccaw hoylei hae paw kha mih thadynnaw kyakhe syde hae.

¹³Minmin kha laenoi kya pynkheihlan marya thuruh hae; minmin kha laephi akaw langkhe heede hae.

¹⁴Tetuh na ranglang kuih nynh taenaw ae pya kho cipaw kae nynh mah kae nykhae cih.

¹⁵Nang kae rae hawte ka raebuapaw Behemoth kha dotua; aning tuh tangnuapaw hawte lonua kha a ae.

¹⁶A thawzung tuh a tae kya um zah, a huhan tuh a vue tharui kyakhe nynh a um.

¹⁷A leihmae kha sidar thing hawte he zah, a phae tharui hae tuh pynkheihlan a um hae.

¹⁸A ru hae tuh sohin ccong te lokuh hae zah, a kuih a ccu hae tuh sivaw ccong te nynh aloku hae.

¹⁹“Tuh-e tuh Pachia nynh a raepaw kyaze masaty nynh thua; amaw a Raetupaw kyalya nynh thaloi te amaw kalan a naekuh kho.

²⁰Loramsaw balyn a paeenaw hae mua nynh amaw hanlan looh kha a pousah.

²¹Hinpawbu kaw khe a rya, phaeku kaw te tuinoh kyakhe a rekuh.

²²Hinpawbu nynh mynlyh a um lante dawpah zah, vawkhu kin e aedu ku hae nynh a koihlu hae.

²³Vawkhu e tui tuh alethung zemah a thinphang khyh; Jordan vaw nynh a khalang kyacia a suh zemah daebabi lan a um.

²⁴Lukhakheit nynh tuh-e tuh bawnawpaw te a kyng kho tou? A naduh kya a napaw a tho kho tou?