Read Zotung Chin JOB 5 Bible Online

JOB 5 - Zotung Chin bible

JOB 5

¹“Atu kotua hae; nang ae oi cih paw hum san um vema? Mithyaa hae kyaze hummou na ngaehoikuh cih?

²Thinrianaw nynh mingaee kha theih zah, eiungnaw nynh tuanaw a zyapaw kha a chia.

³Mingaee nynh atharui a phohpaw kha ka muih, thuasalama vaekheihmawte a umnaw kha thya ka law.

⁴A ccaaw hae tuh khyn khyh hae, byapiazung kya phe shung hae zah, minmin kha a luesah lan hae paw hum sanmah um khyh.

⁵Aning nynh a ruepaw looh kha mih vuelaw hae paw nynh a ae hae, hinpaw laku e heize a lawku hae; tuihawpaw nynh a sisua kha phe a lua.

⁶Pawccecize riathaenaw tuh laenoi kyate yn thua khyh zah, vawsawnaw tuh laephi kyate yn po khyh;

⁷maee-ia apeihpaw tuh aluki lang apia hawte, ccungccaw tuh vawsawnaw tung khylan nynh yn pui.

⁸“Kae tuh Pachia kha ka ccung cih zah, ka tynre balyn kha Pachia kya ka ap cih.

⁹Pachia nynh alesaepaw uccaw, nythya kho um leipaw te riatae um leipaw ngaeang lan umpaw uccaw hae kha a rae.

¹⁰Laephi vawlan khuaarawsah zah, loo kya tui a luasah;

¹¹zakawsangsakuh hae paw kha ahangnaw kya nung hae zah, a rah a khui hae paw kha khynnaw kalan a hangthung hae.

¹²A thyaruh hae paw tuh mih ryalaw kya mih laan mih sui a ua khyh nawlan, mih khuakhannaw kha a ropya hae;

¹³Mihaw hae kha mimaw thyaruhnaw toulou khate kyng hae zah, thyaruh hae khuakhannaw kha alakawpaw lang a tangsah.

¹⁴Minmin tuh ninthu khe mohnaw te tungkuh hae zah, ninthuccynglyn khe khuazi hawte zahkute a cceih hae.

¹⁵Thuasalama khah-e hae munglae kya-e thaloi kyate thuasah, a thawsae hae paw kuih kyate thuasah ryachi hae kha a khum hae.

¹⁶Tukeiccuze ryachi hae nynh ngaehoinaw hoi hae zah, dingleinaw tuh a mung a myh.

¹⁷“Pachia nynh a thuiheipaw tuh pawcih baban mou lungtuapaw athua; tukeiccuze Athunghuapaw nynh thuiheikunaw kha pawlangria leite um nan.

¹⁸Pawccecize aning nynh vaemaw a muesah zemah, tuh-e vaemaw kha a heepya; aning nynh a zia zemah, a kuih te a dansah.

¹⁹Aning nynh vawsawnaw ccangtaruh kyate ae khum cih zah, ccangsari kya mah hoyleinaw pawpaw nynh mah ae ty lan khyh.

²⁰Ccakancci ze chinaw kyate ae thungkhaw cih zah, rhawtuk aso ze thaloi rhaw kyate ae thungkhaw cih.

²¹Thanthya hokunaw kyate ae luesah cih zah, ronaw rhaw yn thua zemah na rih lan khyh.

²²Ronaw te ccakanccinaw apui zemah na nuin cih zah, laephi loramsaw raw kha na rih lan khyh.

²³Pawccecize loo lungkhu e lungpyng hae te na hokheihthya cih oh zah, loramsaw hae te na ccawkuh cih oh.

²⁴Na ryabu tuh akhyn cipaw na nyh cih, na sahiinkhia kha na do cih zah zo lan khyh.

²⁵Na ciihan tuh patae acih cih zah, laephi kya-e lonua zeih a ci hae paw kha na muih cih.

²⁶Accyh azaw te tinnaw hmin kya a thuakhae hae paw ccathae hawte, myarya na taw te na shawku kalan na thua cih.

²⁷Dotua, e hynh kae do mamia zah akyhpaw nynh thua. Ngaetua, namaw hanlan byaccing nynh thua cipaw nytua,” a cipya.