Read Zotung Chin JOB 7 Bible Online

JOB 7 - Zotung Chin bible

JOB 7

¹“Ccungccaw hae nynh laephi vawlan hin ryalaw arupaw hoi khyh hae tou? mih nin hae tuh vaeluapaw ccungccaw nin hae te lokuh khyh tou?

²Myndae myarya a rypaw see hawte thua zah, a ryalaw mee a ngaehoipaw vaeluapaw hawte nynh thua.

³Tuhcite alakaw lan asaw patae rya ka lah zah, riathae lan umpaw khuazi hae kha pya ka thua.

⁴He ka huekuh te, ‘Hohtuhmou ka tho cih?’ ka ci. Thuasalama khuazi tuh myarya sae zah, khua phe dae lan cia ka paleihkuh bungthung.

⁵Zanpaw te athupaw nynh ka ngesaw kha boeining hawte phang yn bong hae; ka ving tuh tang zah phaephae paw.

⁶Ka nin hae tuh boeikuatu kya-e phaeccya laeze ranghua zah, ngaehoinaw um leite dyadya alia hae.

⁷“Ka hiinnaw tuh khivae sasaw hung athuapaw kha liathuitua; ka mit nynh hoynaw kha papin muihthui vae lan khyh.

⁸Kae yn muihpaw mit nynh bua yn muih vae lan khyh; he nae do tuh, ka um vae lan khyh.

⁹Maeking tuh thyaa zah azo hawte, Michi khua lang a rungbungpaw tuh yn kaethung vae khyh;

¹⁰a inn lang kilae vae khyh zah, a umnaw nynh mah amaw kha nyh vae khyh.

¹¹Tukeiccuze ka munglae ka sungkuh lan khyh; lungriathaete ka ho cih; lungvawsaw te ka ccohkuh cih.

¹²Kae tuh rili khyhze nakaa-hupi ka thua zah tetou rintu nae nungpya?

¹³‘Ka ikhung nynh ka thaw yn dansah cih, ka iphae nynh ka ccohkupaw hynh yn daesah cih,’ cite he ka ho te,

¹⁴ka maan kya nae siisakuh zah, vizin hae khate nae risah,

¹⁵tukeiccuze dyngmiakunaw te chinaw kha hynh-e pyn laeze ka pokuh hua cih.

¹⁶Ka hiinnaw hynh ka lungthang vae; zungzae ka hiin lan khyh. Ka ccyh tuh khivae sasaw hung athua keiccuze ka makhaete yn umsah.

¹⁷Ccungccaw hynh paw thua zahte mou myarya aphu na tesah zah na peki?

¹⁸Awkhua takyh na via zah, atu te atu na syntawtua?

¹⁹Ka kyate ccanglang sosoh na hawi lan khyh tou? Ka tuin ka due mawlaezung ka makhaete nae umsah lan khyh tou?

²⁰Ka la sei lanze, ccungccaw a dotu, nang kha pawmou kae cyi? Pawccemou kae hynh themuing lang nae dia? Pawccemou kae hynh na hanlan phupaw aripaw lang ka tang?

²¹Pawccemou ka cyiseinaw hynh nae ngaethya khyh zah, ka hoyleinaw hynh dae nae lawpya khyh? Pawccecize atu laephi kya ka ih cih; nae ccung zemah ka um vae lan khyh,” a ci.