Read Zotung Chin JOB 8 Bible Online

JOB 8 - Zotung Chin bible

JOB 8

¹Te Shuh minphuinpaw Bildad nynh khungru zah:

²“E bya hae hynh hohseciamou na ho ung cih? Na khalang kya-e bya tuh hohseciamou khise hawte athua ung cih?

³Pachia tuh byading kha a paleih boi tou? Tuhkhyhze Athunghuapaw nynh akyhpaw kha a paleih boi tou?

⁴Na ccaaw hae nynh amaw rawsete a sei hae ze, mih cyiseinaw lungkhu langkhe minmin kha a phung hae.

⁵Pachia kha na ccung zah, Athunghuapaw kha na ngiaku lanze,

⁶nang tuh na thyaa zah na ding lanze, aning tuh na hanlan yn thokuh cih zah, ahmepaw na umnaw kya ae umsah thui cih.

⁷Na thotakawnaw tuh dih salamah, nyalang tuh myarya ale cih.

⁸“Alia vae paw she kya-e ccungccaw hae kong kha akaw-aleih khia hae lah, mih minpaaw hae nynh a la muih hae paw kha tuatua;

⁹aening tuh inkhawnin ccungccaw hae ah thua oh zah, pawpaw mah ah nyh khyh oh, laephi vawlan aening ccyh tuh mynlyh nynh hung athua.

¹⁰Minmin nynh a ny hae paw kha ccangpyate ae hopah lan khyh hae tou?

¹¹“Tuiccua a um leinaw kya papairas ku tuh a lethung kho zawtou? Tui a um leinaw kya phaeku tuh a lethung kho zawtou?

¹²Apaw paw cciamang zah, nge athua mawkhe, ccangpaw aku anaan mawze phe arou.

¹³Pachia a ningpaw balyn tuh tuhawte nynh athua hae; Pachia pawlangria lei hae paw kya-e ngaehoinaw tuh aroh cih.

¹⁴Mih zynkunaw tuh ro zoi zah, mih doliakunaw tuh mungrue bu hawte nynh athua.

¹⁵A inn kya a ngeiku lanze, a inn tuh thadyn kho khyh; a kuih te a kyng zemah tyn lan khyh.

¹⁶Ccungccaw hoylei hae paw tuh khuaninpaw kya thingku hae hawte hinlalyh lan um hae zah, atoih thawpaw ange hae tuh khokhu kya a pazaekuh hae.

¹⁷Mih tharui hae nynh lung apumkuhpaw kha ve hae zah lungpi hae laku khe a hiin hae.

¹⁸Mih umnaw hmin kyate ro athua hae lanze, tuh-e hmin nynh, ‘Nanning hynh papin kae muih boi khyh oh,’ a cipah cih hae zah, minmin kha a vua cih hae.

¹⁹Dotua, minmin mih lungtuanaw laanpi tuh tuhcihawpaw thua zah, tuh-e laephi kyate mingccangpaw hae tuh thingku hawte a po cih hae.

²⁰“Dotua, Pachia nynh ccaenaw um leipaw kha vua lan khyh, hoyleinaw a rae hae paw kha tuh bawm lan khyh hae.

²¹Na khalang kha nuinnaw te a biasah cih zah, na munglae kha lungtua siaruanaw te a biasah cih.

²²Nang ae hua hae paw tuh maethyabong athua cih hae zah, ccungccaw hoylei hae bu tuh um vae lan khyh,” a ci.