Read Zotung Chin SAM 10 Bible Online

SAM 10 - Zotung Chin bible

SAM 10

¹Pou BAWIPAW , pawccemou asawnaw kya na thadyn? Pawccemou vawsaw ccyh lya na reku?

²Ccungccaw hoy leipaw nynh lysakute a ryachipaw kha a tuaa a sah, a paccyn hae paw thyaruhnaw kyakhe kaangkae hae sah.

³ccungccaw hoy leipaw tuh a thinlung rynaw kyakhe a pookuh, a karankuhpaw ccungccaw nynh BAWIPAW kha thyalaw zah a vua.

⁴Ccungccaw hoy leipaw nynh a lysaku keiccuze, “Pachia nynh muih lan khyh,” a ci; a tuapaw balyn tuh, “Pachia um khyh,” cipaw hynh nynh thua.

⁵A ryalaw tuh a laan a sui pei a ua; Pachia byapianaw kha thaethya kho khyh; a rhaw hae kha a sarya hae.

⁶A thinlung kyakhe, “Ka shung boi lan khyh; she takyh kya vawsawnaw ka tung boi lan khyh,” cite a tuaku.

⁷A khalang tuh thyalawnaw bya, hynbya te tuaasahnaw bya te nynh phe abia; a lae kya rysawthyanaw te hoyleinaw a um.

⁸Khua kyaze rekunaw hmin kyakhe buh zah, a sei leipaw ccungccaw kha a chia. Bawmtu a hoi leipaw kha aruh lante zya a buhkhaw;

⁹chindeih hawte rekunaw hmin kyakhe ccungccaw kha a buh; a ryachipaw kha kyng khylan a buh; a ryachipaw kha kyng zah, a kaang kalan a sue.

¹⁰Tuhcite vawsaw a tungpaw tuh a huekuh, te bawmtu hoi leipaw tuh a thawsaepaw keiccuze a khuliakuh.

¹¹A thawsaepaw nynh a thinlung kyakhe, “Pachia nynh phe a ning vae, a mae tuh ccanglang phe hawi vae, e hynh kharouh muih vae lan khyh,” cite a tuaku.

¹²Pou BAWIPAW , pou Pachia, thoku tua lah, na kuih hangtua; tuaasahkunaw a teing hae paw kha ning nan hae.

¹³Ccungccaw hoylei hae paw nynh Pachia kha maeleihtawku te, “Pachia nynh de oun tah lan khyh,” cite pawccemou mih thinlung kya a tuakuh cih hae?

¹⁴Thuasalama nang nynh tuh phe na muih! Mih vawsawnaw te mih ngaethyanaw kha na muih zah, bawm khylan na paccynkuh zungzae; bawmtu hoi leipaw nynh amaw toulou kha na kalan a pyaku; nang tuh ngawraw bawmtu nynh na thua.

¹⁵Ccungccaw hoy leipaw te misei hae kuih kha khyatua; mih hoyleinaw kha pong na muih makhia ccungpya tua hae.

¹⁶BAWIPAW tuh zungzae te zungzae cia siapharan nynh thua; Pachia beik leipaw minphuin hae tuh a ram kyate ro athua cih hae.

¹⁷Pou BAWIPAW , thinlung a nepaw nynh a rypaw kha na thaepah cih; mih lungthaw na saesah cih hae.

¹⁸Ccungccaw nynh a laephi kyate myarya ri lan umpaw kha bua a langsaku khyh nawlan, ngawraw te tuaasahnaw a teing hae paw hanlan dingnaw raepya khylan, a siaruanaw hae kha na thaepya hae.