Read Zotung Chin SAM 103 Bible Online

SAM 103 - Zotung Chin bible

SAM 103

¹David Hlaw Pou ka muisaw, BAWIPAW kha thehoysah tua, ka lungkhu umpaw balyn, a min thyaapaw kha thehoysah oh.

²Pou ka muisaw, BAWIPAW kha thehoysah lah, a thawccinaw balyn kha ning nan.

³Aning tuh na seinaw balyn kha ae ngaethyatupaw thua zah, na ccinaw balyn kha ae dansahtupaw nynh thua.

⁴Na hiinnaw kha Hunghuapi kyate ae shawkhawpaw thua zah, atynpaw sungsahnaw te thawccinaw khate nang kha bawilukhung ae khungsahpaw nynh thua.

⁵Mosipi thawzung hawte na ngawphuenaw kha thawsah thui athua nawlan, na hiin lungkhu balyn hoynaw te na lungrya ae chisahpaw nynh thua.

⁶BAWIPAW nynh tuaasahnaw a ingpaw balyn hanlan dingnaw te byapianaw kha a raepya hae.

⁷A laanpi kha Moses nysah zah a cyisahnaw kha Israel ccungccaw hae a nysah hae.

⁸BAWIPAW tuh thawccih thyapaw, ngaethyaumsah thyapaw, lungsaepaw te atynpaw sungsahnaw te phe abeihpaw nynh thua.

⁹Ccungccaw tungvaw seibenaw zungzae mang lan khyh zah, zungzae a thinria lan khyh.

¹⁰Ah seinaw thyhte aening kha oun cyihru khyh zah, ah hoyleinaw thyhte oun liaru khyh.

¹¹Vaawlui tuh laephi laeze ahang hawte atynpaw a sungsahnaw tuh amaw a rih hae paw tungvaw myarya ale;

¹²nithua tuh niccaw te asawku hawte ah cyiseimenaw kha aening kyate oun vuapya vae.

¹³Paaw nynh a ccaaw tungvaw thawccinaw a hoi hawte, BAWIPAW nynh amaw rawrih hae paw tungvaw thawccinaw a hoi vae.

¹⁴Pawccecize aening hynh pawtemou rae ah thua oh cipaw kha nyh zah, aening tuh laenoi nynh ah thua oh cipaw kha mah a nythui.

¹⁵Ccungccaw ccyh tuh lonua hawte nynh thua; ccungccaw tuh loo kya-e haetapaw hawte apaw;

¹⁶khisan nynh tuh-e haetapaw tuh mung zah phe azo, a umnaw hmin kha mah ny lan um vae khyh.

¹⁷Thuasalama BAWIPAW kya-e atynpaw sungsahnaw tuh amaw rawrih hae paw tungvaw kya zungzae te zungzae cia tyn zah, a dingnaw tuh ccaawsenopaw cia atyn,

¹⁸a byakin a zui hae paw tungvaw te a kawbya zui lan a ning lei hae paw tungvaw kya atyn.

¹⁹BAWIPAW nynh a bawitungkhung tuh vaawlang khe tynsah vae zah, a peenaw nynh atyn-are kha a uk.

²⁰A hopaw bya kha kawngae hae zah a kawpyapaw a zui hae paw, athungpaw a vaawccungccaw hae nanning, BAWIPAW kha thehoysah oh.

²¹BAWIPAW rynaw a zuipaw a ryalahtu hae, a vaaw rhawkaw hae balyn, BAWIPAW kha thehoysah oh.

²²A uknaw hmin takyh kya um hae paw, amaw nynh a rae hae paw balyn, BAWIPAW kha thehoysah oh. Pou ka muisaw, BAWIPAW kha thehoysah tua.