Read Zotung Chin SAM 104 Bible Online

SAM 104 - Zotung Chin bible

SAM 104

¹Pou ka muisaw, BAWIPAW kha thehoysah tua. Pou BAWIPAW ka Pachia, nang tuh myarya na lesae. Sawtuanaw te lesaenaw khate na ccaankuh zah,

²awnaw kha boeining hawte na zingku. Vaawlui kha boeibu hawte tharae na daw zah,

³avawlan umpaw tui vawlan khe na inn kha na sak; maeking kha na marangle lang na mang zah, khivae sake vawlan khe na cciku,

⁴khivae kha na locceihtu lang na mang zah, maee te maeesoi kha na ryalahtu lang na mang hae.

⁵Laephi tuh kharouh a nueku khyh ccaw cite, a umnaw kyakhe na tynsah.

⁶Laephi kha boeining te bong hawte rili te na bong; tui hae tuh mua hae luki khe a thadyn hae.

⁷Nang nynh tui hae tuh na pe hae zah a ccue hae; na kholungthyhpaw roi kha thae hae zah rangsakute a cceih hae.

⁸Mua vawlan te bialae langkhe luabung hae zah, minmin elang na paccynpya hae paw hmin kya a thua hae.

⁹Tui hae nynh laephi kha bua a vu khyh ccaw hae cite, po alua kho lei lante ramri kha na ia.

¹⁰Accya khe tuidy kha na phyhsah zah, mua hae laku khe alua hae,

¹¹loramsaw miakaw kha nia lanpaw tui na pya hae; ramkaw e lann hae kha mih tuihaw na kesah vae hae.

¹²Tuh-e tui kin khe vaawlang e pavaw hae tuh bu luakuh hae zah, thingkaran hae kya hlawsah hae.

¹³Vaawlui kyate mua hae kha tui na bu hae; laephi tuh na ryalaw athae khate a lungryachih.

¹⁴Sahiin hae elang lonua kha na posah zah, ccungccaw hae nynh mang khylan thingku kha na posah, te laephi kyate looh tuh apou,

¹⁵misutui nynh ccungccaw kha a lungtuasah zah, chitui nynh mitmae kha a awsah, te sanlou nynh ccungccaw thaw a saesah.

¹⁶BAWIPAW thingku hae, Lebanon kya a lingpaw sidar ku hae kha tui patae a bu hae.

¹⁷Tuh-e thingku hae kyakhe pavaw hae nynh mih bu a luaku hae; kaepaw-pavaw nynh maeccaw ku kya a luaku.

¹⁸Ahangpaw mua hae tuh sathaw hae hanlan thua zah, lung pipi hae tuh saveih dihpaw hae hanlan khynnaw nynh thua hae.

¹⁹Kumvaelori ny nawlan sawpaw kha na rae vae; khuanin nynh a ccaw ccyh kha a nyku.

²⁰Mohnaw kha na rae, tuh-e tuh khuazi nynh thua, tuh ccyh lyakhe ramkaw e sarangpaw balyn tuh a pou hae.

²¹Anopaw chindeih hae tuh saw teiku khylan a sia hae, Pachia kya-e mih looh kha a ccungku hae.

²²Khuanin he athua te, ki hae zah mih karung kya a ih hae.

²³Ccungccaw hae tuh mih ryalawku khylan pou hae zah, zete cia rya a lah hae.

²⁴Pou BAWIPAW , na rae hae paw hynh pawcih baban mou alung! tuh-e hae balyn kha hawnaw te na rae vae; laephi tuh na raepaw te phe abeih.

²⁵Rilipi tuh myarya le zah ako, tuin kyakhe riatae um leipaw avawthya hae paw, ahiinpaw adih ale a um hae.

²⁶Tuin kyakhe sanphalung hae tuh ccue hae zah, tuin kya a zue lante na raepaw Leviathan hupi mah a um.

²⁷Tuh-e hae balyn nynh accyh azaw te, mih looh mueku khylan nang kha ae ngaehoi hae;

²⁸looh kha he na pya hae te, minmin nynh a ccakhungku hae; na kuih he na daw te, minmin tuh ahoypaw uccaw te phe a byn hae.

²⁹Na mitmae he na retawkuh hae te, minmin tuh mih thinphang; mih hy he na thangsah hae te, chih hae zah mih laenoi kalan a ki hae.

³⁰Na muisaw kha he na sawpah hae te, minmin tuh a hiin hae; te laephi mitmae kha na thawsah thui.

³¹BAWIPAW phu-enaw tuh zungzae tyn vae sah; BAWIPAW tuh a raepaw kya a lungtua vae sah—

³²laephi kha do zah laephi tuh a thyngkuh, mua hae kha ty zah maeekhuh a pou.

³³Ka hiin lungkhu balyn BAWIPAW kalan hlaw ka sah cih; hiinnaw ka hoi lyakhe ka Pachia kalan thehoysahnaw hlaw ka sah cih.

³⁴Kae tuh BAWIPAW kya ka lungtua keiccuze aning tuh ka tuanaw kya a lungrythua vae sah.

³⁵Misei hae tuh laephi kyate maemih thua hae sah lah, ccungccaw hoylei hae paw tuh um nan vae hae sah. Pou ka muisaw, BAWIPAW kha thehoysah tua. BAWIPAW kha thehoysah!