Read Zotung Chin SAM 109 Bible Online

SAM 109 - Zotung Chin bible

SAM 109

¹David Hlaw The ka hoysahpaw Pachia, daetedae lan um nan.

²Pawccecize ccungccaw hoylei hae te mihyn hae nynh kae kha rawsete ahynthyapaw lae te ka than yn ho hae.

³Huanaw bya te kae kha yn koihlu hae zah, akonglang um leite yn dou hae.

⁴Minmin hanlan saw ka sangpya lya hae heize ka sungsahnaw kha seibenaw te yn liaru hae.

⁵Tuhcite hoynaw kha hoyleinaw khate yn liaru hae zah, ka sungsahnaw kha huanaw khate yn liaru hae.

⁶Khah-e paw kha rawsete ccungccaw hoyleipaw kha khang lah, tuh-e seibetupaw tuh a ranglang khe thadyn sah.

⁷Byapianaw he a ing te, phe shung sah; a sawsangnaw kha seinaw lante riapya thua sah.

⁸A hiinshe dyn sah lah, a rya kha mingccangpaw nynh ccou sah.

⁹A ccaaw hae tuh ngawraw lang tang hae sah lah, a zu tuh nomae lang tang sah.

¹⁰A ccaaw hae tuh khiavuikuh hae sah lah, aepaw a ngiakuh hae paw lang tang hae sah; arohpaw mih umnaw kyate ccaring dee thua hae sah.

¹¹A hoipaw balyn kha laebah a umsahtupaw nynh kyngpah sah; a ryalaw mee kha mikhia hae nynh luade hae sah.

¹²Lu kheit nynh sanmah a tungvaw ngaethyaumsahnaw hoi nan sah, a ccaaw hae ngawraw hae tungvaw thawccinaw a hoipaw lu kheit sanmah um nan sah.

¹³A ciihan phe mih sah lah, a min tuh she ningnaw kya zo ccavae sah.

¹⁴BAWIPAW nynh a minpaaw hae hoyleinaw kha liathui sah lah, a nung seinaw kha ngaethya nan sah.

¹⁵Tuh-e seinaw hae tuh BAWIPAW malang um zungzae sah lah, laephi kyate minmin liathuinawpaw syntawnaw kha zo sah.

¹⁶Pawccecize aning nynh thawccinaw langsaku lanpaw kha tua vae khyh, ryachi hae, ahobou hae paw te thinlung a koi hae paw kha phe a chih lan hae cia vawsaw a pya hae.

¹⁷Aning tuh thyalawnaw a rypaw thua zah, a tungvaw thyalawnaw ccah sah; hythuanaw a ry leipaw thua zah, hythuanaw tuh amaw kyate sawkuh sah.

¹⁸Thyalawnaw kha a angkile hawte a kiku, thyalawnaw tuh a pyn lungkhu lang tui hawte tee sah lah, a ru lungkhu lang chitui hawte tee sah.

¹⁹Thyalawnaw tuh a lawkupaw boeining hawte thua sah lah, nin takyh a cciakupaw taeccia hawte thua sah.

²⁰Tuhcihawpaw tuh kae yn rawse hae paw te ka thethya yn ho hae paw nynh BAWIPAW kyate a mue hae paw mih cyisahnaw mee thua vae sah.

²¹Pou BAWIPAW ka Bawipaw, na min liate kamaw ccelang ryalawtua; atynpaw na sungsahnaw tuh ahoy keiccuze kae hynh yn luesah tua.

²²Pawccecize kae tuh ka ryachi zah a hoboupaw nynh ka thua, ka lungkhu kya ka thinlung myarya ccih.

²³Zete ccyh e mynlyh hawte vyavya ka zo; kae tuh tungkhipaw hawte ccaring ka peih.

²⁴Looh ae leite ka um keiccuze ka ccukharu tuh a thawzya zah, ka pyn tuh ka ngethah.

²⁵Kae tuh ccungccaw hae nynh yn theihrya hae paw ka thua zah, he yn muih vae hae ze, mih lu yn henua hae.

²⁶Pou BAWIPAW ka Pachia, yn bawmtua! atynpaw na sungsahnaw liate yn khumtua.

²⁷Pou BAWIPAW , e tuh na cyipaw, na kuih te na raepaw nynh thua cipaw minmin nynh nyh hae sah;

²⁸Minmin nynh thya a law hae zemah, nang nynh tuh hythua na pya cih. Kae yn rawse hae paw tuh maethyabong thua hae sah; na ryalahtupaw tuh a lungtua sah.

²⁹Sei yn be hae paw tuh thethyanaw khate bong thua hae sah; boeining te bongku hawte mih maethyanaw khate bong thua hae sah.

³⁰Ka khalang te BAWIPAW kha thawte ka thehoysah cih; ccungccaw patae laku khe amaw kha ka thehoysah cih.

³¹Pawccecize ryachi hae kha chia lan sei a be hae paw kyate khum khylan, aning tuh ryachi hae ranglang khe phang a thadyn.