Read Zotung Chin SAM 112 Bible Online

SAM 112 - Zotung Chin bible

SAM 112

¹BAWIPAW kha thehoysah oh! BAWIPAW raw a rih hae paw te a kawbya kya myaryamaw mih lungrythua hae paw tuh lungtua hae paw nynh thua.

²Mih ciihan hae tuh ram lungkhu kya mih thawsaepaw athua cih hae; miding hae ciihan tuh hythuapya athua cih hae.

³Mih inn kya sisua te hoirumnaw um zah, mih dingnaw tuh zungzae atyn.

⁴Miding hae hanlan mohnaw kya awnaw hawte a langkuh hae; minmin tuh thawccih thyapaw, ngaethyaumsah thyapaw te adingpaw nynh thua hae.

⁵Ming hae kha hysahte koiisakuh hae zah, hmerarih lante rya a lahpaw tuh hoynaw a mue cih.

⁶Miding hae tuh tyty atyn cih hae; minmin kha zungzae liathui athua cih hae.

⁷Thethyapaw thae kha rih khyh hae; mih thinlung tuh tyn zah, BAWIPAW kya a khyn hae.

⁸Mih thinlung tuh tyn zah rih lan khyh hae; athangnaw kya tuh mih rhaw hae tungvaw taenaw a mue cih hae.

⁹Minmin nynh alakawte a nee vae hae, ryachi hae kha a pya vae hae; mih dingnaw tuh zungzae atyn, mih huhan athuapaw mih ki kha sawtuanaw te hangthung athua.

¹⁰Ccungccaw hoylei hae paw nynh tuh-e tuh muih hae zah mih thinria; mih hawzy hae zah, mih ngethyakhaekuh; ccungccaw hoylei hae paw rynaw tuh accakaepaw lang nynh a tang.