Read Zotung Chin SAM 116 Bible Online

SAM 116 - Zotung Chin bible

SAM 116

¹BAWIPAW kha ka sungsah, pawccecize ka roi te ka bohkunaw bya kha yn thaepya.

²A nakaring kha yn tuapyaku keiccuze ka hiin lungkhu balyn amaw kha ka ko cih.

³Chinaw kaang nynh phang yn koihlu; Sheol kya-e vawsawnaw nynh yn kyng zah, riathaenaw te thinphangnaw kha ka teing.

⁴Tetuh “Pou BAWIPAW , saw ka sang, ka hiinnaw hynh beih yn khum!” cite BAWIPAW min kha ka ko.

⁵BAWIPAW tuh thawccih thyapaw te a dingpaw nynh thua; ah Pachia tuh ngaethyaumsah thyapaw nynh thua.

⁶BAWIPAW nynh bawmtu hoi lei hae paw kha a thungkhaw hae; he yn dothatheih vae hae ze, aning nynh yn khum.

⁷BAWIPAW tuh ka tungvaw myarya ahoy keiccuze Pou ka muisaw, ngaengante umtua.

⁸BAWIPAW nynh ka hiinnaw kha chinaw kyate thuasah, ka mit kha mitphi luanaw kyate thuasah, ka ccu kha thykunaw kyate thuasah yn luesah vae.

⁹A hiin hae paw ram kyakhe BAWIPAW malang cciate ka hiin.

¹⁰“Kae tuh riathaenaw myaryamaw ka teing,” ka ci lya heize, ka zynnaw tuh tynkaring.

¹¹“Ccungccaw miakaw tuh mihyn hae nynh thua,” cite bungzoute ka ho.

¹²BAWIPAW tuh ka tungvaw eih ahoy keiccuze aning kha pawmou ka pyaru cih?

¹³Khumnaw banang kha ka hang cih zah, BAWIPAW min kha ka ko cih.

¹⁴Bya ka kinkupaw kha BAWIPAW ccungccaw hae balyn malang khe amaw kha ka pya cih.

¹⁵A mithyaa hae nynh a chi hae paw tuh BAWIPAW muihnaw kya myarya aphute.

¹⁶Pou BAWIPAW , kae tuh na ryalahtu nynh ka thua; kae tuh na ryalahtunung ccaaw, na ryalahtu nynh ka thua. Yn khiinaw hae paw kha nae supya vae.

¹⁷Namaw kalan lungtua silawnaw kha ka rae cih zah, BAWIPAW min kha ka ko cih.

¹⁸Bya ka kinkupaw kha BAWIPAW ccungccaw hae balyn malang khe ka pya cih.

¹⁹Pou Jerusalem, na ngaelung a umpaw, BAWIPAW inn voidu lungkhu khe ka pya cih. BAWIPAW kha thehoysah oh!