Read Zotung Chin SAM 119 Bible Online

SAM 119 - Zotung Chin bible

SAM 119

¹Mih hiinnaw kya ccaenaw um leipaw te BAWIPAW kawbya a zui hae paw tuh lungtua hae paw nynh thua.

²A phunglang a zui hae paw, mih thinlung balyn te amaw a ccung hae paw te

³hoyleinaw rae leite, a laanpi a zui hae paw tuh lungtua hae paw nynh thua.

⁴Na kawbya hae kha zuakute zui lan kaw nae pya vae.

⁵Na phungbya zuinaw kyakhe ka laanpi tuh tyn vae sah!

⁶Tetuh na kawbya balyn kha hoyte dokute, maethyanaw ka mue lan khyh.

⁷Adingpaw na phungzae kha he ka nyh te, thinlung adingpaw te nang kha kae thehoysah cih.

⁸Na phungbya kha ka zui cih; kae kha kharouh beih yn vua nan.

⁹Mino hae nynh mih laanpi kha pawtemou a thyaasah kho cih hae? Na bya thyhte raeringkunaw liate a thyaasah cih hae.

¹⁰Ka thinlung balyn te nang kha kae ccung; na kawbya kyate ccanglang yn cciasah sei nan.

¹¹Na tungvaw ka sei khyh nawlan, na bya kha ka thinlung kya ka ccykeku.

¹²Pou BAWIPAW , nang kha kae thehoysah; na phungbya kha beih yn ccangpah.

¹³Nae hopyapaw na phungzae balyn kha ka siakhae cih.

¹⁴Hoirumnaw patae kya lungrythuakhaeku hawte, na phunglang kyakhe ka lungry a thuakhaekuh cih.

¹⁵Na kawbya kyakhe ka thinlung kha tyty ka nung cih zah, na laanpi kha hoyte ka dokuh cih.

¹⁶Na phungbya kyakhe ka lungrythua cih zah, na bya kha ka ning lan khyh.

¹⁷Ka hiin zah na bya ka zuithya nawlan, na ryalahtupaw tungvaw kya hoynaw raetua.

¹⁸Na kawbya lungkhu e ngaeangthua lan umpaw uccaw hae kha a muih nawlan, ka mit yn awsah tua.

¹⁹Laephi vawlan hin mikhia hawte ka um; na kawbya kha ka kyate thuruh nan.

²⁰Na phungzae kha eih a ry zungzae keiccuze ka muisaw tuh maee lang arua.

²¹Na kawbya a zui lei hae paw thyalaw athua hae paw te a lysakuh hae paw kha na thuihei hae.

²²Na phunglang kha ka zui vae keiccuze, yn theihryanaw hae te yn dothatheihnaw hae kha ka kyate yn lawpya tua.

²³Uktu bawi hae nynh kae kha rawsete khua a khanku hae ze heize, na ryalahtupaw kae tuh na phungbya hae kha ka thinlung kya tyty ka nung cih.

²⁴Na phunglang tuh ka lungrythua zah, tuanaw hoypaw yn pyatu nynh thua.

²⁵Ka hiinnaw tuh vuiping kya nynh a kalouhku vae; na bya thyhte yn hiinsah thui.

²⁶Ka cyisahnaw balyn kha he ka ho te, nang nynh nae leih; na phungbya hae kha yn ccangpah.

²⁷Na ccangpyanaw laanpi kha yn thaethyasah lah, ngaeangthua lan umpaw na ryalaw hae kyakhe ka thinlung kha tyty ka nung cih.

²⁸Ka ngaethya keiccuze ka thinlung phe atui; na bya thyhte thawzung yn pyatua.

²⁹Akyh leipaw laanpi kha ka kyate sawsakuh lah, na kawbya kha thawccinawte yn ccangpya tua.

³⁰Lungzinaw laanpi kha ka poku vae; na phungzae hae kha ka malang ka nungku vae.

³¹Pou BAWIPAW , na phunglang hae kha ka zui; maethya yn lah nan.

³²Thaethyanaw houhouh nae pya keiccuze, na kawbya laanpi kyakhe ka ccue.

³³Pou BAWIPAW , na phungbya laanpi kha yn ccangpah lah, tuh-e tuh athangnaw cia ka zui cih.

³⁴Na kawbya kha ccykekute ka thinlung balyn te ka zui nawlan, thaethyanaw beih yn pya.

³⁵Na kawbya kyakhe ka lungry athua keiccuze, na kawbya laanpi kyakhe beih yn cciakhae.

³⁶Ka thinlung te na phunglang kha yn rysah lah, karankunaw yn hoisah nan.

³⁷Ka mit hynh ccungkia leipaw uccaw yn dosah nan; na laanpi kyakhe hiinnaw yn pya.

³⁸Na raw ae rih hae paw hanlan na raepaw na byakinnaw kha na ryalahtu ka tungvaw kya ccingsah tua.

³⁹Na phungzae hae tuh ahoy keiccuze ka ripaw thethyanaw kyate yn luesah.

⁴⁰Dotua, na kawbya hae kha ka ry; na dingnaw kya yn hiinsah.

⁴¹Pou BAWIPAW , atynpaw na sungsahnaw tuh ka tungvaw yn thua sah lah, na byakinnaw thyhte na khumnaw mah yn thua sah.

⁴²Tetuh na bya kha ka doliaku keiccuze, yn sarya hae paw kha bya ka khung kho cih hae.

⁴³Na phungzae kha ka ngaehoiku keiccuze byaccingpaw kha ka mung kyate papin yn lawpah nan.

⁴⁴Na kawbya kha zungzae te zungzae cia po ka zui cih.

⁴⁵Na kawbya kha ka ccung vae keiccuze luenaw kyakhe ka cceih cih.

⁴⁶Na kawbya kha siapharan hae malang khe ka ho cih zah, ka maethyakhae lan khyh.

⁴⁷Na kawbya hae kha ka ry keiccuze tuh-e kawbya hae kyakhe ka lungrythua cih.

⁴⁸Ka rypaw na kawbya hae kha saw ka tua zah, na phungbya hae kha tyty ka tua cih.

⁴⁹Na ryalahtupaw hanlan na bya kha liathuitua, tuh-e na bya kha nae ngaehoisah vae.

⁵⁰Na byakinnaw nynh hiinnaw yn pya keiccuze ka vawsawnaw kya zemah ka ngaengan.

⁵¹A lysakuh hae paw nynh kae kha myarya yn theihrya hae, thuasalama na kawbya kyate ka cceihsei khyh.

⁵²Pou BAWIPAW , langmawlya e na phungzae hae kha he ka tua tuh, ngaengannaw ka mue.

⁵³Na kawbya a vua hae paw ccungccaw hoylei hae keiccuze myarya ka thinria.

⁵⁴Ka umnaw inn miakaw kya na phungbya hae tuh ka hlaw nynh thua hae.

⁵⁵Pou BAWIPAW , khuazi kya na min kha ka liathui zah na kawbya kha ka zui.

⁵⁶Na kawbya hae kha ka zui vae keiccuze e hythuanaw hae hynh ka mue.

⁵⁷BAWIPAW tuh ka ccou lanpaw ka hanpaw nynh thua; na bya kha zui lan bya ka kinku.

⁵⁸Ka thinlung balyn te na kya-e maehoynaw kha kae ngiaku; na byakinnaw thyhte ka tungvaw thaw beih yn ccih.

⁵⁹Na laanpi kha he ka tua te, na phunglang kalan ka maeleihkuh zah ka zui.

⁶⁰Na kawbya zui lan ka rangsakuh zah ka thysung khyh.

⁶¹Ccungccaw hoylei hae paw nynh mih kaangrui te yn kaesah hae zemah, na kawbya kha ka ning khyh.

⁶²Adingpaw na phungzae hae keiccuze nang kha thehoysah khylan ziraccyng khe ka tho.

⁶³Kae tuh na rawrih hae paw balyn te na kawbya a zui hae paw mih ruiban nynh ka thua.

⁶⁴Pou BAWIPAW , laephi tuh atynpaw na sungsahnaw te phe abeih; na phungbya hae kha yn ccangpya tua.

⁶⁵Pou BAWIPAW , na bya thyhte na ryalahtu tungvaw na hoy.

⁶⁶Na kawbya hae kha ka zyn keiccuze ahoypaw byapiathyanaw te nythyanaw kha yn ccangpya tua.

⁶⁷Vawsawnaw ka tung maw tuh ka cceihsei, thuasalama atu tuh na bya kha ka zui.

⁶⁸Nang tuh na hoy zah ahoypaw kha na cyi; na phungbya hae kha yn ccangpya tua.

⁶⁹A lysakuh hae paw nynh hynbya te ka thethya yn ho hae, thuasalama ka thinlung balyn te na kawbya kha ka zui.

⁷⁰Mih thinlung tuh thaethyanaw hoi khyh zah a rysaw athah, thuasalama kae tuh na kawbya kyakhe ka lungrythua.

⁷¹Na phungbya hae kha ccangku khylan, vawsaw ka tungpaw hynh kamaw hanlan ahoy.

⁷²Na hopaw kawbya tuh sui te ngun athong-asan laeze ka hanlan ahoyhua.

⁷³Na kuih nynh kae kha yn rae zah, khyndadyh lan yn nung; na kawbya hae kha ka ccangku nawlan, thaethyanaw beih yn pya.

⁷⁴Na bya kha ka ngaehoi vae keiccuze na rawrih hae paw nynh yn muih cih hae zah mih lungtua cih.

⁷⁵Pou BAWIPAW , na byapianaw tuh akyh cipaw ka nyh zah, na lungzinaw keiccuze vawsawnaw nae tungsah vae cipaw ka ny.

⁷⁶Na ryalahtu tungvaw bya na kinku thyhte, atynpaw na sungsahnaw tuh ka ngaengannaw lang tang vae sah.

⁷⁷Na kawbya tuh ka lungrythuakhaeku keiccuze ka hiin nawlan thaw yn ccitua.

⁷⁸A lysakuh hae paw nynh hynthyanaw te yn ro vae hae keiccuze maethyanaw mue hae sah; kae tuh na kawbya kyakhe ka ohleihkuh cih.

⁷⁹Na rawrih hae paw nynh na phunglang kha a ny nawlan hae, ka kalan oun maeleihkuh hae sah.

⁸⁰Maethya ka bongku khyh nawlan, ka thinlung tuh na phungbya kya ccaenaw um leipaw thua vae sah.

⁸¹Ka muisaw tuh na khumnaw a ngawnaw kya a thawthang; na bya kha ka ngaehoiku.

⁸²Na byakinpyakupaw kha ka dokhawnaw ze ka mit phe ccih vae; “Hohtuhmou ngaengannaw nae pya cih?” cite ka khia.

⁸³Kae tuh maeekhuh kya umpaw savingtui-um hawte nynh ka thua vae, tuhzemah na phungbya kha ka ning loh khyh.

⁸⁴Hohsemou na ryalahtupaw nynh ka ngaesang ung cih? Vawsaw yn pya hae paw hynh hohtuhmou bya na pia cih hae?

⁸⁵A lysakuh hae paw nynh hunghua yn thaekhaw vae hae; minmin nynh na kawbya kha a rawse hae.

⁸⁶Na kawbya balyn tuh atyn; akonglang um leite vawsaw yn pya hae; beih yn bawmtua!

⁸⁷Minmin nynh laephi vawlan te vyavya yn zosah vae hae; thuasalama na kawbya hae kha ka vua khyh.

⁸⁸Na hopaw phunglang hae kha ka zui ccaw hae, atynpaw na sungsahnaw te ka hiinnaw hynh beih yn haang.

⁸⁹BAWIPAW tuh zungzae atyn; na bya tuh vaawram kya tynkaring lan a um.

⁹⁰Na lungzinaw tuh she takyh kya atyn; laephi kha na tynsah zah, tynkaring lan a um.

⁹¹Atyn-are tuh na ryalahtu hae athua keiccuze kaw na pya thyhte atunin cia atyn hae.

⁹²Na kawbya hynh ka lungry a la thua khyh lanze, vawsaw ka teingnaw kya phe ka la chih vae cih.

⁹³Na kawbya hae kha papin ka ning lan khyh, pawccecize e na kawbya hae liate hiinnaw nae pya.

⁹⁴Kae tuh na kya-e nynh ka thua; beih yn khumtua, pawccecize na kawbya hae kha ka ccung zah ka zui vae.

⁹⁵Ccungccaw hoylei hae paw nynh chia khylan yn buhkhaw hae, thuasalama na phunglang kha ka tua.

⁹⁶Pawpaw mah accingpaw um khyh cipaw ka ny vae, thuasalama na kawbya tuh myaryamaw ako.

⁹⁷Na kawbya hynh pawcih baban mou ka ry! E kyahin anin ninlang ka tua.

⁹⁸Na kawbya nynh zungzae yn umkhae keiccuze ka rhaw hae laeze yn hawsah hua.

⁹⁹Na phunglang hae kha tyty ka tua keiccuze ka sazae hae balyn laeze ka nyhthyahua.

¹⁰⁰Na kawbya kha ka zui keiccuze akum tang hae paw laeze ka nyhthyahua.

¹⁰¹Na bya kha zui khylan ahoy leipaw laanpi miakaw kha ka sibia.

¹⁰²Nae ccangpya vae keiccuze na phungzae hae kyate ccanglang ka maekuh khyh.

¹⁰³Na bya tuh ka taangtua zah pawcih baban mou a e, ka khalang kya khoilutui laeze a ehua.

¹⁰⁴Na kawbya liate nythyanaw ka mue; tukeiccuze ahme leipaw laanpi miakaw kha ka hua.

¹⁰⁵Na bya tuh ka ccu hanlan maeekhua thua zah, ka laanpi hanlan awnaw nynh thua.

¹⁰⁶Adingpaw na phungzae kha zui khylan bya ka kinkuh vae zah ka tynsah vae.

¹⁰⁷Pou BAWIPAW , ka teingnaw tuh myaryamaw accih; na bya thyhte beih yn hiin sah.

¹⁰⁸Pou BAWIPAW , the kae hoysahnawpaw silawkunawpaw hynh beih yn ccoupah lah, na phungzae kha yn ccangpya tua.

¹⁰⁹Ka hiinnaw tuh ka kuih kya nynh tyty a um, thuasalama na kawbya kha ka ning khyh.

¹¹⁰Ccungccaw hoylei hae paw nynh kaang yn syakhaw hae, thuasalama na kawbya kyate ccanglang ka cceihsei khyh.

¹¹¹Na phunglang hae tuh zungzae ka rho thua zah, ka thinlung a lungtuanawpaw nynh thua.

¹¹²Na phungbya hae kha athangnaw cia zungzae zui khylan ka thinlung kya bya ka paeku vae.

¹¹³Thinlung apheipaw kha ka hua, thuasalama na kawbya kha ka ry.

¹¹⁴Nang tuh ka rekunaw hmin te ka khawriaphua nynh na thua; na bya kha ka ngaehoi.

¹¹⁵Hoyleinaw a rae hae paw nanning, ka Pachia kawbya kha ka zui nawlan, ka kyate asawkunaw lang cceih oh.

¹¹⁶Ka hiin nawlan, na byakinnaw thyhte yn bawmtua, ka ngaehoinaw kya maethyanaw yn muesah nan.

¹¹⁷Ka khyn nawlan te na phungbya hae kha tyty ka peki nawlan, phang yn kyngtua.

¹¹⁸Na phungbya zui leite a cceihseipaw balyn kha na vua hae; pawccecize mih thyaruhnaw tuh accakaepaw nynh thua.

¹¹⁹Laephi vawlan e ccungccaw hoyleipaw balyn hynh athupaw lang nynh na ria hae; tukeiccuze na phunglang hae kha ka ry.

¹²⁰Na raw ka ri keiccuze ka thyngkuh, na byapianaw kha ka rih.

¹²¹Ahmepaw te akyhpaw kha ka cyi vae; yn tuaa yn sah hae paw kyakhe yn nungsya nan.

¹²²Na ryalahtupaw ka hoynaw hanlan bya yn kinpyaku tua; a lysakuh hae paw nynh vawsawnaw yn pya nan hae sah.

¹²³Na khumnaw te adingpaw na byakin accingnaw kha ka donaw ze ka mit phe ccih vae.

¹²⁴Atynpaw na sungsahnaw thyhte na ryalahtu hynh yn ccuepe lah, na phungbya hae kha yn ccangpah.

¹²⁵Kae tuh na ryalahtu nynh ka thua; na phunglang hae kha ka ny nawlan, nythyanaw beih yn pya.

¹²⁶Na kawbya kha a vua vae hae keiccuze atu hynh BAWIPAW hanlan ryalaw ccyh nynh athua vae.

¹²⁷Thanccingte, na kawbya hae kha sui laeze ka ryhua zah, sui hoypaw laeze mah ka ryhua.

¹²⁸Tukeiccuze na kawbya balyn kha ka zui zah, ahme leipaw laanpi miakaw kha ka hua.

¹²⁹Na phunglang hae tuh ngaeangthua lan a um; tukeiccuze ka hiinnaw nynh khah-e phunglang hae kha a zui.

¹³⁰Na kawbya kha ccaerarih lan phynaw nynh awnaw kha a pya; tuh-e nynh tuanaw a zya hae paw kha nythyanaw a pya hae.

¹³¹Na kawbya kha eih ka ry keiccuze ka khalang ka aw zah ka hy phe law.

¹³²Na min a ry hae paw kha thaw leih na cci hae hawte, ka kalan yn hawi lah, thaw beih yn ccitua.

¹³³Bya nae kinpyaku thyhte ka laan ka sui yn uasahpah lah, hoyleinaw nynh kae kha papin yn uk nan sah.

¹³⁴Na kawbya hae kha ka zui kho nawlan, ccungccaw tuaasahnaw kyate yn shawkhawtua.

¹³⁵Na ryalahtupaw tungvaw kya na mitmae kha awsah lah, na phungbya hae kha yn ccangpya tua.

¹³⁶Na kawbya kha a zui khyh keiccu hae ze, ka mit kyate mitphi tuh vaw hawte alua.

¹³⁷Pou BAWIPAW , nang tuh na ding zah, na byapianaw tuh ahme.

¹³⁸Nae pyapaw na phunglang hae tuh a dingpaw te a lungzipaw nynh thua.

¹³⁹Ka rhaw hae nynh na bya kha a ning hae keiccuze ka thinrianaw nynh maee hawte yn u.

¹⁴⁰Na byakin tuh hoyte syntawtua thua zah, na ryalahtu kae nynh khah-e kha ka ry.

¹⁴¹Kae tuh a nyaapaw te a dothatheih hae paw nynh ka thua, tuhzemah na kawbya hae kha ka ning khyh.

¹⁴²Na dingnaw tuh zungzae tynpaw dingnaw thua zah, na kawbya tuh byaccing nynh thua.

¹⁴³Vawsawnaw te lungriathaenaw nynh ka tungvaw yn thuanua vae, thuasalama na kawbya hae tuh ka lungrypaw nynh thua.

¹⁴⁴Na phunglang hae tuh zungzae ading; nythyanaw kha beih yn pya lah, ka hiin cih.

¹⁴⁵Ka thinlung balyn te ka sia; Pou BAWIPAW , beih yn leihtua. Na phungbya hae kha ka zui cih.

¹⁴⁶Na kalan khe ka sia; na phunglang hae kha ka zui nawlan, beih yn khumtua.

¹⁴⁷Khua adae mawte ka tho zah, bawmnaw mue khylan ka sia; na bya kha ka ngaehoiku.

¹⁴⁸Na byakinpyanaw kha tuate zidae ka mit masi leite po ka hah.

¹⁴⁹Atynpaw na sungsahnaw liate ka roi beih yn thaepah; Pou BAWIPAW , na byading liate ka hiinnaw beih yn haang.

¹⁵⁰Ahoy leipaw eenaw hoite vawsaw yn pya hae paw nynh ka kalan oun naeku hae, minmin tuh na kawbya te a sawkuh hae.

¹⁵¹Tuhzemah pou BAWIPAW , nang tuh ka pe na um, na kawbya balyn tuh akyh.

¹⁵²Na phunglang hae kha zungzae na tynsah vae cipaw tuh langmawlya mawte ka la ny vae.

¹⁵³Ka riathaenaw hynh yn do lah, yn luesah tua, pawccecize na kawbya kha ka ning khyh.

¹⁵⁴Ka tungpaw bya te than kyahin yn pankhaw lah, yn shawkhawtua; na byakinnaw thyhte beih yn hiinsah.

¹⁵⁵Khumnaw tuh ccungccaw hoylei hae paw kyate a sawkuh, pawccecize na phungbya kha ccung khyh hae.

¹⁵⁶Pou BAWIPAW , na thawccinaw tuh myarya ale; na byading thyhte hiinnaw beih yn pya.

¹⁵⁷Yn tuaa yn sah hae paw te ka rhaw hae tuh myarya alung hae, tuhzemah na phunglang kyate ka maekuh khyh.

¹⁵⁸Mih lungzi lei hae paw kha ka do hae zah ka luathua, pawccecize na kawbya kha zui khyh hae.

¹⁵⁹Na kawbya kha pawcih baban mou ka ry cipaw tuatua; atynpaw na sungsahnaw thyhte ka hiinnaw hynh beih yn haang.

¹⁶⁰Na bya hynh abalyn mawte byaccing nynh thua; adingpaw na phungzae ccangkheit cci tuh zungzae atyn.

¹⁶¹Uktu bawi hae nynh akonglang um leite yn tuaa yn sah hae, thuasalama ka thinlung tuh na bya kha a rih.

¹⁶²Aphutepaw sisua patae a muihkuhpaw hawte na bya kyakhe ka lungtua.

¹⁶³Hynbya kha ka hua zah ka luathua, thuasalama na kawbya kha ka ry.

¹⁶⁴Adingpaw na phungzae hae keiccuze nin kheit ze vae sari kae thehoysah.

¹⁶⁵Na kawbya a ry hae paw tuh myarya lepaw daenaw a hoi hae; pawpaw nynh mah minmin kha khulia kho khyh hae.

¹⁶⁶Pou BAWIPAW , na khumnaw kha ka ngaehoikuh zah, na kawbya hae kha ka zui.

¹⁶⁷Ka hiinnaw nynh na phunglang hae kha a zui; khah-e phunglang hae kha myaryamaw ka ry.

¹⁶⁸Na kawbya hae te na phunglang hae kha ka zui, pawccecize ka hiinzia balyn kha phe na muih.

¹⁶⁹Pou BAWIPAW , ka siaruanaw hynh na kya thua vae sah; na bya thyhte nythyanaw beih yn pya.

¹⁷⁰Kae ngianaw hynh na kya thua vae sah; bya na kinpyaku thyhte yn luesah tua.

¹⁷¹Na phungbya hae kha nae ccangpya keiccuze ka mung nynh thehoysahnaw bya kha a ho cih.

¹⁷²Na kawbya balyn tuh akyh keiccuze ka mung ka lae nynh na byakinkunaw kha hlaw te a sah cih.

¹⁷³Na kawbya hae kha ka poku vae keiccuze na kuih tuh kae kha bawm khylan paccynkute um sah.

¹⁷⁴Pou BAWIPAW , na khumnaw kha myarya ka ry, na kawbya tuh ka lungrypaw nynh thua.

¹⁷⁵Nang kha the kae hoysah kho nawlan, hiinnaw beih yn pyatua, na phungzae hae nynh kae kha yn bawm hae sah.

¹⁷⁶Tuu azopaw hawte ka cceihsei vae; na ryalahtupaw hynh beih yn ccung, pawccecize na kawbya kha ka ning khyh.