Read Zotung Chin SAM 135 Bible Online

SAM 135 - Zotung Chin bible

SAM 135

¹BAWIPAW kha thehoysah oh! Pou BAWIPAW ryalahtu hae, BAWIPAW min kha thehoysah oh;

²BAWIPAW inn kya a thadyn hae paw, ah Pachia inn voidu lungkhu kya ryalah hae paw nanning, amaw kha thehoysah oh.

³BAWIPAW kha thehoysah oh, pawccecize BAWIPAW tuh ahoy; aning tuh thawccih thyapaw athua keiccuze a min thehoysahnaw hlaw kha sah oh.

⁴Pawccecize BAWIPAW nynh Jakob kha amaw hanlan pokuh zah, Israel kha amaw elang a poku vae.

⁵BAWIPAW tuh a lesaepaw nynh thua cipaw ka ny; ah Bawipaw tuh ccangpaw pachia balyn laeze a lesaehua.

⁶Vaaw te lae kya thuasah, rili te akhunaw balyn kya thuasah BAWIPAW nynh a rypaw miakaw kha a cyi.

⁷Laephi adianaw kyate maeking kha a pousah thung; khuaaraw nawlan khozaw kha a rae; a ccakhungnaw inn kyate khivae kha a pousah.

⁸Izip ram e ccatawccaw te thanty kha a chia hae.

⁹Pou Izip, na ngaelung a umpaw Faro te a ryalahtu hae balyn kha rawsete muihsahnaw te ngaeangnaw kha aning nynh a rae.

¹⁰Minphuin patae te athungpaw siapharan hae kha a chia hae,

¹¹Amor hae siapharan Sihon, Bashan hae siapharan Og te Kanaan peenaw kya-e hae balyn kha theih hae zah,

¹²mih ram kha a ccungccaw Israel hae kalan rho lang a pya hae.

¹³Pou BAWIPAW , na min tuh zungzae atyn, Pou BAWIPAW , na minthaannaw tuh she takyh atyn.

¹⁴Pawccecize BAWIPAW nynh a ccungccaw hae kha pankhaete bya a piapah cih hae zah, a see hae kha ngaethya a umsah cih hae.

¹⁵Minphuin ccangpaw hae kya-e zohtuh hae tuh ccungccaw kuih te raepaw sui te ngun nynh thua hae.

¹⁶Tuh-e zohtuh hae tuh khalang a hoi hae zemah byaho khyh hae; mit a hoi hae zemah ngawmuih khyh hae;

¹⁷nakaring a hoi hae zemah nawthae khyh hae, mih khalang kya hy um khyh.

¹⁸Zohtuh a raetu hae paw te zohtuh a doliakuh hae paw balyn tuh zohtuh hae hawmawte athua cih hae.

¹⁹Pou Israel ccungccaw hae, BAWIPAW kha thehoysah oh! Pou Aaron ciihan hae, BAWIPAW kha thehoysah oh!

²⁰Pou Levi ciihan hae, BAWIPAW kha thehoysah oh! BAWIPAW rawrih hae paw nanning, BAWIPAW kha thehoysah oh!

²¹Jerusalem kya umpaw BAWIPAW kha Zion kyate thehoysah oh. BAWIPAW kha thehoysah oh!