Read Zotung Chin SAM 140 Bible Online

SAM 140 - Zotung Chin bible

SAM 140

¹David Hlaw Pou BAWIPAW , hoyleinaw a rae hae paw kyate beih yn luesah; a puatho hae paw kyate yn thungkhawtua,

²mih thinlung kya ahoy leipaw kha paccyn hae zah rhawtuknaw kha palei a puisah hae.

³Mih lae kha hupaw lae hawte hesah hae zah, mih munglae kyakhe huparepaw sy a um.

⁴Pou BAWIPAW , ccungccaw hoylei hae paw kyate phang yn rintua; kae kha khulia khylan yn paccynnuakuh hae paw, a puatho hae paw kyate yn thungkhawtua.

⁵A lysakuh hae paw nynh kaang yn syakhaw hae, arui khate miaa kha yn zokhaw hae zah, laanpi kyakhe kaang po yn syakhaw hae.

⁶BAWIPAW kalan khe, “Nang tuh ka Pachia nynh na thua; Pou BAWIPAW , kae ngianaw roi hynh yn thaepya tua,” cite ka hopya.

⁷Pou BAWIPAW , a thungpaw yn luesahtu ka Bawipaw, rhawtuk nin khe ka lu kha nae bong vae.

⁸Pou BAWIPAW , ccungccaw hoylei hae paw rynaw kha ua nan hae; ahoy leipaw mih paccynkunaw kha ccingsahpah nan hae.

⁹Kae yn koihlu hae paw nynh mih lu kha a hangthung hae; mih munglae a hoyleinaw kha nynh mimaw kha phang bong hae sah!

¹⁰Zaezae epaw maee-e nynh mih tungvaw ccawphu hae sah! hunghua lungkhu langkhe, pou kho lei lante ccaring vua thua hae sah!

¹¹Mihyn hae kha ram lungkhu kya tynsah nan hae; hoyleinaw nynh a puatho hae paw kha arangte roh hae sah!

¹²BAWIPAW nynh a hoboupaw kha pankhaw zah, a ryachipaw hanlan hmerarih lan a cyipya cipaw kha ka ny.

¹³Miding hae nynh na min kha ae thehoysah ccaccing cih hae; miding tuh na umnaw kyakhe a um cih.