Read Zotung Chin SAM 144 Bible Online

SAM 144 - Zotung Chin bible

SAM 144

¹David Hlaw Ka lungpi athuapaw BAWIPAW tuh thehoyte um sah, aning nynh rhawtuk nawlan ka kuih kha ccangpah zah, rhawdou nawlan ka kuihdung kha a ccangpya.

²Aning tuh ka lungpi, ka rhawlungrua, ka khynnaw te yn luesahtu, ka khawriaphua, ka khynnawpaw, minphuin ccangpaw hae kha ka zakaw a sangsahtupaw nynh thua.

³Pou BAWIPAW , ccungccaw hynh paw athua keiccu mou na peki? ccungccaw hynh paw athua keiccu mou na tua?

⁴Ccungccaw hynh vaekheit suepaw hy te nynh aloku; ccungccaw ccyh tuh azothyapaw mynlyh te nynh aloku.

⁵Pou BAWIPAW , vaawlui kha poh hung lah, yn rungbung tua; mua hae kha ty hae lah, maeekhuh apou cih.

⁶Khozaw kha laesakuh lah, rhaw hae kha kaheikalah phiasakuh hae; na the kha kaw lah, minmin kha roh hae.

⁷Ahangnaw kyate na kuih kha dyng lah, akhupaw tui kyate thuasah, ramccang hae kuih kyate thuasah yn luesah lah, yn khumtua,

⁸mih khalang nynh hynbya ho zah, mih ranglang kuih tuh ahme leipaw nynh thua.

⁹Pou Pachia, na kalan hlaw thawpaw kha ka sah cih; arui ruihaw umpaw tintang kha kae khuapah cih.

¹⁰Siapharan hae kha taenaw na pya hae zah, na ryalahtu David kha na luesah.

¹¹A rysawthahpaw thaloi rhaw kyate kae kha nae khum zah, ramccang hae kuih kyate nae luesah, mih khalang nynh hynbya kha ho zah, mih ranglang kuih tuh ahme leipaw nynh thua.

¹²Kae ccapaw hae tuh mino athua lya hae khe, myarya hoy lan alepaw thingku hawte thua hae sah lah, kae ccanung hae tuh siapharan inn sak nawlan a aw hae paw apaki lang e tungpi hawte thua vae hae sah.

¹³Kae ccung-inn hae tuh looh aphuinphuin te phe beih sah; kae tuu hae tuh kae loram kya athong-asan te pungthung hae sah,

¹⁴kae vaetua hae mah ataw patae than hae sah. khualungrua vikute teenuakunaw um nan sah lah, ramccang lang deekunaw um nan sah, khua lungkhu e laanpi hae kya lungriathaete siaruanaw um nan sah.

¹⁵Tuhcihawpaw hythuanaw a umnaw ccungccaw hae tuh lungtua hae paw nynh thua; BAWIPAW tuh mih Pachia athuapaw ccungccaw hae tuh lungtua hae paw nynh thua.