Read Zotung Chin SAM 145 Bible Online

SAM 145 - Zotung Chin bible

SAM 145

¹[36] Ka Pachia te ka Siapharan, nang kha kae thehoysah, na min kha zungzae te zungzae cia kae thehoysah cih.

²Nin takyh kae thehoysah cih zah, na min kha zungzae te zungzae cia kae thehoysah cih.

³BAWIPAW tuh lesae zah, myaryamaw thehoysah lanpaw nynh thua; a lesaenaw tuh marya ny kho um khyh.

⁴Na ryalaw hae kha she kheit koute she kheit a thehoysah cih hae zah, ngaeangthua lan umpaw na cyipaw kha a siakhae cih hae.

⁵Na phu-e lesaenaw te ngaeangthua lan umpaw na ryalaw hae kha hoyte ka tua cih.

⁶Ri lan umpaw na cyipaw huhan kha a siakhae cih hae zah, na lesaenaw kong kha ka hopah cih hae.

⁷Myarya lepaw na hoynaw kong kha a ho cih hae zah, na dingnaw kong kha myarya ccae lan hlaw te a sah cih hae.

⁸BAWIPAW tuh thawccih thyapaw, ngaethyaumsah thyapaw, a lungsaepaw thua zah, atynpaw sungsahnaw te phe beihpaw nynh thua.

⁹BAWIPAW tuh ccungccaw hae balyn tungvaw hoy zah, a raepaw balyn tungvaw kya thawccinaw a hoi.

¹⁰Pou BAWIPAW , na raepaw balyn nynh nang kha ae thehoysah cih hae zah, alungzipaw na ccungccaw hae balyn nynh ae thehoysah cih hae.

¹¹Minmin nynh na peenaw a phu-enaw te na huhan kong kha a ho cih hae,

¹²tetuh ccungccaw hae balyn nynh ngaeangthua lan umpaw na cyipaw te na peenaw huhan aphu-epaw kha a nyh cih hae.

¹³Na peenaw tuh zungzae tynpaw peenaw thua zah, na uknaw tuh she takyh atyn. BAWIPAW tuh a hopaw bya balyn kya a lungzi zah, a cyipaw balyn kya thawccinaw a hoi.

¹⁴BAWIPAW nynh a khuliakuh hae paw balyn kha bawm hae zah, a nyaasah hae paw balyn kha a hangthung hae.

¹⁵Ahiinpaw ahysuepaw balyn nynh ngaehoinaw te nang kha ae do hae zah, accyh azaw te mih looh kha na pya hae.

¹⁶Na kuih kha na daw zah, ahiinpaw ahysuepaw miakaw mih rynaw kha na ccingsahpya hae.

¹⁷BAWIPAW tuh a ryalaw miakaw kya adingpaw thua zah, a cyipaw balyn kya thawccinaw a hoi.

¹⁸BAWIPAW tuh amaw a ko hae paw balyn, byaccing te a ko hae paw balyn pe khe a um.

¹⁹Amaw raw a rih hae paw balyn rynaw kha a ccingsahpya hae; mih siaruanaw kha mah thaepah hae zah a khum hae.

²⁰BAWIPAW nynh amaw a sungsah hae paw balyn kha a rin hae, thuasalama ccungccaw hoy leipaw balyn kha a ro hae.

²¹Ka khalang nynh BAWIPAW thehoysahnaw bya kha a ho cih zah, ccungccaw hae balyn nynh a min thyaapaw kha zungzae te zungzae cia a thehoysah cih hae.