Read Zotung Chin SAM 147 Bible Online

SAM 147 - Zotung Chin bible

SAM 147

¹BAWIPAW kha thehoysah oh! ah Pachia kalan thehoysahnaw hlawsah tuh pawcih baban mou ahoy; pawccecize aning tuh thawccinaw a hoi, hlaw te thehoysah lan a ngaekuhpaw nynh thua.

²BAWIPAW nynh Jerusalem kha sak zah, a dee hae paw Israel hae kha a suelua hae.

³Thinlung koi hae paw kha dansah hae zah, mih vaemaw kha a heepya hae.

⁴Awsi accanlu kha ria zah, mih balyn te min a phu hae.

⁵Ah Bawipaw tuh lesae zah a huhan myarya ale; a hawnaw tuh tou kho um khyh.

⁶BAWIPAW nynh zakaw a sangsakuhpaw kha a hangthung hae; ccungccaw hoylei hae paw kha laephi kalan a vua hae.

⁷BAWIPAW kalan lungtuanaw hlawsah oh; ah Pachia kalan tintang khuakute roi hoypaw saw oh.

⁸Vaawlui kha maeking te bong zah, laephi hanlan khuaa a rawsah, mua hae kya lonua a posah.

⁹Aning nynh sarangpaw hae kha looh pya hae zah, va-aw taw hae nynh a sia hae ze looh a pya hae.

¹⁰Marang hae thawzung kyakhe a lungrythua khyh zah, rangtareih lan a ccue hae paw kya mah a lungrythua khyh;

¹¹thuasalama BAWIPAW tuh amaw rawrih hae paw te atynpaw a sungsahnaw kha a ngaehoikuh hae paw kyakhe nynh a lungrythua.

¹²Pou Jerusalem, BAWIPAW kha thehoysah! Pou Zion, na Pachia kha thehoysah!

¹³Pawccecize aning nynh na koikua ccong kha tynsah zah; na lungkhu e na ccaaw hae kha hythua a pya hae.

¹⁴Na ramri lungkhu kya daenaw umsah zah, ahoy huaccepaw chanvuih te nang kha na vue ae sosah.

¹⁵Aning nynh laephi kha kawpya zah, a bya tuh arangte yn thua.

¹⁶Vuiraw kha tuuming alo lante a ccawsah; dangtui kha mah buhhaw alo lante a hei.

¹⁷Hya kha lungpyng hawte a ccawsah, a kyaasahnaw kyakhe hum nynh mou a thadyn kho cih?

¹⁸Aning nynh kawpya zah tuh-e hya hae tuh atui hae; a khisan kha zawsah zah tui alua.

¹⁹A bya kha Jakob kya a hopya, a phungbya te a phungzae kha Israel hae kya a hopya hae.

²⁰Minphuin ccangpaw hae kya tuhcite cyih khyh; minmin nynh a phungzae kha nyh khyh hae. BAWIPAW kha thehoysah oh!