Read Zotung Chin SAM 17 Bible Online

SAM 17 - Zotung Chin bible

SAM 17

¹David Sawsangnaw Pou BAWIPAW , adingpaw kae ngianaw hynh ngaetua; ka siaruanaw hynh yn thaepya tua; hynpaw bya athua leipaw ka sawsangnaw hynh yn ngaepya tua.

²Ka kalan te bya yn piapah lah, akyhpaw kha muihtua.

³Ka thinlung hynh akaw-aleih nae do ze thuasah, khuazi ccyh kya nae paebua ze thuasah, nae syntawtua ze thuasah ka tungvaw kya hoyleinaw kha na muih lan khyh; ka khalang tuh hosei khyh.

⁴Ming hae nynh a cyi hae hawte thua leite, na bya liate puathonaw laanpi kha ka sibia vae.

⁵Na laanpi kha tynkaring lan ka zui zah, ka ccu tuh thei khyh.

⁶Pou Pachia, kae kha nae thaepah cih keiccuze nang kha kae ko; na naw kha ka kalan beih yn tuakuh lah, ka bya hynh yn thaepya tua.

⁷Na kya a rekuh hae paw kha mih rhaw hae kyate na ranglang kuih te na khumtu hae paw Pou Khumtu, atynpaw na sungsahnaw kha ngaeang lan a um lante langsaku tua.

⁸Kae yn tuaa yn sah hae paw ccungccaw hoylei hae paw kyate thuasah, kae kha koihlute yn theih ry hae paw ka rhaw hae kyate thuasah na mitlungdy hawte yn rin lah, na sake mynlyh kyakhe yn resaku tua.

¹⁰Ngaethyaumsahnaw hoi leite, mih khalang te lysakunaw bya kha a ho hae.

¹¹Ka ccianaw takyh langkhe yn koihlu hae; kae kha laephi kya khulia khylan mih mit te phang yn buh hae.

¹²Zoihtatyh lan pia khylan a zuakuhpaw chindeih hawte thua hae zah, arekunaw hmin kya phang a buhpaw chindeih anopaw te nynh aloku hae.

¹³Pou BAWIPAW , thoku tua, minmin kha hawilia hae lah, khuliatua hae! Ka hiinnaw hynh ccungccaw hoylei hae paw kyate na thaloi khate yn luesah tua.

¹⁴Pou BAWIPAW , ccungccaw hae kyate thuasah, mih hiinnaw kya mih hanpaw tuh hynh-e laephi vawlan kyalya a umpaw ccungccaw hae kyate thuasah ka hiinnaw hynh na kuih khate yn luesah tua. Minmin hanlan na ccakhungpya hae paw khate mih vueso sah; mih ccaaw hae tuh a zaw hae laelan hoi hae sah; mih mintaw hae, mih mintasin hae hanlan mah ccangkhakheit nungsya hae sah.

¹⁵Kae nynh tuh na mae kha dingnaw kya ka muih cih; he ka thaekuh te, na muinsan kha muihte ka lungccing cih.