Read Zotung Chin SAM 18 Bible Online

SAM 18 - Zotung Chin bible

SAM 18

¹[3] (2Sa 22.1-51) Pou BAWIPAW , ka thawzung na thuapaw nang kha kae sungsah.

²BAWIPAW tuh ka lungpi, ka rhawlungrua, yn luesahtu, ka Pachia, ka khynnaw lungpi, ka khawriaphua, yn khumpaw saki te ka rekunaw nynh thua.

³Thehoysah lan angaekuhpaw BAWIPAW kha ka ko, tukeiccuze ka rhaw hae kyate khum ka thua cih.

⁴Chinaw arui nynh phang yn voi; ronaw tuithaw nynh yn luathin.

⁵Chinaw arui nynh phang yn khethinku; chinaw kaang nynh phang yn kaesah.

⁶Ka vawsaw lyakhe BAWIPAW kha ka ko; ka Pachia kalan khe bawmnaw mue khylan ka sia. A beikinn kyate ka roi kha yn thaepah zah, amaw kalan ka sianaw tuh a nakaring kya phe a thua.

⁷Pachia a thinria keiccuze laephi tuh hy zah a thyngkuh; mua leihpaw hae mah ahy hae.

⁸A naduh kyate maeekhuh pouthung zah, a khalang kyate aruapaw maeesoi te zaezae epaw maeehue a pou.

⁹Vaawlui kha hung zah yn rungbung; marae zipingpaw mohnaw tuh a ccu kaw kya a um.

¹⁰Cherubim kha ccikuh zah a zou; khivae a sake vawlan khe arangte a zou.

¹¹Amaw toulou kha mohnaw te a bongku, tui te marae mohkhaekuhpaw maeking nynh phang a bong.

¹²A malang e phaephae akpaw kyate phang zipingpaw maeking kya-e hya te maee-e a ccah hae.

¹³BAWIPAW mah vaawlui khe kholung lang thyh zah, Ahang Huaccepaw Pachia nynh a roi a saw.

¹⁴Te a the kha kaw zah, rhaw hae kha a phiasaku hae; ria he a kawsah tuh, phiariphiarae a ccue vae hae.

¹⁵Pou BAWIPAW , thinriate na pe hae zah, na naduh kyate hy he na saw tuh, rilipi kaw phe lang zah, laephi aleihpaw mah phe a lang.

¹⁶BAWIPAW nynh ahangnaw kyate yn dyngnuakuh zah yn hoeilang; myarya khupaw tui lungkhu kyate po yn sue.

¹⁷Athungpaw ka rhaw hae kyate thuasah, kae yn hua hae paw kyate thuasah yn luesah; pawccecize minmin tuh ka hanlan myaryamaw a thung hae.

¹⁸Minmin nynh ka vawsaw ccyh lyakhe yn dou hae; thuasalama BAWIPAW nynh yn bawm.

¹⁹Akopaw hmin lang yn cciakhae; Ka tungvaw a lungrythua keiccuze yn luesah.

²⁰BAWIPAW nynh ka dingnaw thyhte lasung yn pya; ka kuih a thyaa thyhte yn pyaru.

²¹Pawccecize BAWIPAW laanpi kha ka zui zah, ka Pachia kyate seinaw raete ka phiakuh khyh.

²²Pawccecize a phungzae hae balyn kha ka zui zah, a phungbya hae kha ka vua khyh.

²³A malang ccaenaw um leipaw ka thua zah, hoyleinaw kha ka sibia.

²⁴Tukeiccuze BAWIPAW nynh ka dingnaw thyhte thuasah, a muihnaw kya ka kuih athyaa thyhte thuasah yn pyaru vae.

²⁵A lungzipaw tungvaw kya lungzinaw kha na langsaku, ccaenaw a um leipaw kya ccae lan um leinaw kha na langsaku.

²⁶Athyaapaw ccungccaw kya thyaanaw kha na langsaku; ccungccaw hoyleipaw kya rawsenaw kha na langsah.

²⁷Zakaw a sangsakuhpaw ccungccaw kha na khum, thuasalama lysakunaw mitdae a dae hae paw kha na biabung hae.

²⁸Pou BAWIPAW , nang tuh ka maeekhua yn awsahpahtu nynh na thua; BAWIPAW , ka Pachia nynh ka mohnaw kha a awsah.

²⁹Namaw liate ka rhaw hae kha ka ro kho hae, ka Pachia liate khualungrua kha po ka zou kho.

³⁰E Pachia tuh, a laanpi phe accing; BAWIPAW byakinpyakunaw nynh ahmepaw kha ccaekia a khan; Aning tuh amaw kya a rekuh hae paw balyn hanlan khawriaphua nynh thua.

³¹BAWIPAW laelan hummou Pachia athua? aening Pachia laelan hummou lungpi athua?

³²Aning tuh thawzung kha ka tae kya yn khiidepahtu thua zah, ka laanpi kha a khynsah.

³³Ka ccu kha sazuh ccu hawte a liazawsah zah, ahangnaw khe khyndadyh lan yn nung.

³⁴Ka kuihbaw nynh sohin li kha a sue kho nawlan, ka kuih kha rhawtuk nawlan yn ccangpya.

³⁵Na khumnaw khawriaphua kha nae pya vae zah, na ranglang kuih nynh yn bawm vae; nae bawmnaw nynh yn lesaesah vae.

³⁶Ka ccusy hanlan laanpi akopaw kha nae pya zah, ka ccu tuh thei khyh.

³⁷Ka rhaw hae kha ka deehui hae zah ka phya hae; ka maemih makhia hae ka kitaw khyh hae.

³⁸A thokuh kho lei lan hae, ka bua hae zah, ka ccu kaw kya a khuliakuh hae.

³⁹Pawccecize rhawtuknaw hanlan thawzung kha ka tae kya nae khiidepya; ka rhaw hae kha ka zakaw khe na bakhungsah hae.

⁴⁰Ka rhaw hae kha ka kyate na maeleihsakuh hae zah, kae yn hua hae paw kha ka ro hae.

⁴¹Bawmnaw ngiakute a sia hae zemah, minmin a khum lan hae paw humhung mah um khyh; BAWIPAW kalan a sia hae zemah leihru khyh hae.

⁴²Khivae kya-e vuiping hawte, phe khui lan ka miade hae; laanpi kya-e tuiccua hawte, ka syde hae.

⁴³Ccungccaw hae ryte rhawkunaw kyate nae luesah; minphuin hae uktu lang nae rae; ka ny boi leipaw ccungccaw hae nynh rya yn lawpya hae.

⁴⁴Ka bya he a thae miakaw hae te, ka kaw a ngae hae; ramccang hae tuh bohkute ka kalan oun cceih hae.

⁴⁵Ramccang hae tuh mih thawthah zah, mih rhawlungrua lungkhu te thyngkute oun pou hae.

⁴⁶BAWIPAW tuh a hiin! Ka lungpi tuh thehoyte um sah, Yn khumtupaw Pachia tuh hangthungte um sah.

⁴⁷Pachia tuh phulawrunaw yn pyatu thua zah, ccungccaw hae kha ka zakaw a sangsahtu hae nynh thua;

⁴⁸ka rhaw hae kyate yn luesahpaw nynh thua; kae yn rawsetu hae luki lang nae hangthung ccaccing; a puathopaw ccungccaw hae kyate nae luesah.

⁴⁹Tukeiccuze, pou BAWIPAW , minphuin hae laku kya kae thehoysah cih zah, na min thehoysahnaw hlaw kha ka sah cih.

⁵⁰Pachia nynh a siapharan kha taenaw alepaw a pya; chitui a thuhpaw David te a ciihan hae kya atynpaw sungsahnaw kha zungzae a langsahpya hae.