Read Zotung Chin SAM 19 Bible Online

SAM 19 - Zotung Chin bible

SAM 19

¹David Hlaw Vaawlui nynh Pachia phu-enaw kha ho zah, vaawlui kya adawkuhpaw nynh a kuihhae kha a langsah.

²Khuadae nynh khuadae kha hopah pathy zah, khuazi nynh khuazi kha a hopya pathy.

³Ho te mah ho khyh hae, bya te mah pousah khyh hae; mih roi kha thae lan um khyh;

⁴tuhzemah mih roi tuh laephi pynpi kya po zeihkuh zah, mih bya tuh laephi athangnaw cia phe a thua. Pachia nynh khuanin hanlan vaawlui kya bu a sakpya,

⁵khuanin tuh a khaan lungkhu te yn poupaw zudy ccangvaepaw hawte thuasah, a laanpi kya lungtuate a ccuepaw ccungccapaw athungpaw hawte thuasah yn pou.

⁶Vaawlui athangnaw voikheit langte yn tho zah, voikheit lang athangnaw cia po a cceih; amaw asonaw kyate a rekuh khopaw pawpaw mah um khyh.

⁷BAWIPAW phung tuh phe accingpaw thua zah, hiinnaw kha a thawsah; BAWIPAW phunglang tuh akyhpaw thua zah, a haw leipaw kha a hawsah.

⁸BAWIPAW phungbya tuh ahmepaw thua zah, thinlung kha a lungtuasah; BAWIPAW kawbya tuh ccaerarihpaw thua zah, mit kha a awsah.

⁹BAWIPAW rawrinaw tuh athyaapaw thua zah, zungzae atyn; BAWIPAW phungzae hae tuh akyhpaw thua zah, zungzae adingpaw nynh thua.

¹⁰Hynh-e hae hynh sui laeze thuasah, sui ccipaw patae lae heize thuasah ry lan a umhua hae paw nynh thua; khoilutui laeze ehua zah, khoidaw kyate accawpaw khoitui laeze a ehua.

¹¹Tuhpiaze, e phungzae hae nynh na ryalahtupaw kae kha raeringnaw yn pya hae; e phungzae hae zuinaw liate myarya lepaw lasung a um.

¹²Hummou amaw a cyiseinaw kha a muihkuh kho? Alangkuh leipaw cyiseinaw kyate kae kha yn thyaasah.

¹³Lungraroute seinaw kyate mah na ryalahtupaw kae hynh yn khyn sah lah, hynh-e seinaw hae nynh kae kha yn uk nan hae sah. Tetuh ccaenaw um leipaw ka thua cih zah, myarya lepaw seinaw kyate ka lue cih.

¹⁴Ka khalang kya-e bya te ka thinlung kya-e tuanaw tuh na nawccawpaw lang tang sah, Pou BAWIPAW , ka lungpi te yn shawkhawtu.