Read Zotung Chin SAM 30 Bible Online

SAM 30 - Zotung Chin bible

SAM 30

¹[4] Pou BAWIPAW , kae thehoysah cih, pawccecize nae khum vae zah, ka rhaw hae kha kae ka keiccuze mih lung na tuasah khyh hae.

²Pou BAWIPAW ka Pachia, na kalan bawmnaw ngiakute ka sia zah, kae kha nae dansah vae.

³Pou BAWIPAW , ka muisaw kha michi khua kyate na lawthung, Hunghua lungkhu lang a rungbung hae paw kyate hiinnaw kha bua nae pya.

⁴Pou alungzipaw a mithyaa hae nanning, BAWIPAW kha thehoysahnaw hlawsahpah oh, athyaapaw a min kha thehoysah oh.

⁵A thinrianaw tuh sosoh kyalya nynh thua, a hoynaw tuh shemazi hanlan nynh thua. Khuazi kya rawkhuinaw um salamah, awkhua kya vae tuh lungtuanaw yn thua.

⁶Hoynaw ka mue lya tuh, “Yn tae boi lan khyh hae,” ka ci.

⁷Pou BAWIPAW , na hoynaw liate, tynkaringpaw mua hawte kae kha nae tynsah vae. na mitmae nae retawku vae ze, rinaw te phe ka beih.

⁸Pou BAWIPAW , na kalan ka sia zah, bawmnaw kae ngiaku:

⁹Ka chih zah shawku langkhe hung ka ccia lanze, pawmou thanenaw a um? Laenoi nynh nang kha ae thehoysah cih tou? Na lungzinaw kong kha a ho cih tou?

¹⁰Pou BAWIPAW , ka bya yn thaepah lah, thaw beih yn ccih! Pou BAWIPAW , kae yn bawmtu thuatua!

¹¹Ka raw ka khuinaw kha lawnaw lang nae paleihpya vae; ka raw ka khuinawpaw buriboei kha nae khahpah zah, lungtuanaw boei kha nae zingsaku.

¹²Tetuh ka muisaw tuh daebabi lan um lan khyh zah, nang kha ae thehoysah cih. Pou BAWIPAW ka Pachia, nang kha zungzae kae thehoysah cih.