Read Zotung Chin SAM 31 Bible Online

SAM 31 - Zotung Chin bible

SAM 31

¹David Hlaw Pou BAWIPAW , na kya ka rekuh; maethyate yn nung nan; na dingnaw te yn luesah tua.

²Na nakaring kha ka kalan yn tuaku tua lah, arangte beih yn khumtua. Nang tuh ka hanlan khynnaw lungpi thua lah, kae kha khum khylan sihkakinpaw rhawlungrua thuatua.

³Nang tuh ka lungpi te ka rhawlungrua nynh na thua ccaccing; pawccecize na min hanlan yn cciakhae lah, yn muihsah tua,

⁴yn syakhaw hae paw kaang kyate yn luesah tua, pawccecize nang tuh ka khynnaw nynh na thua.

⁵Ka muisaw hynh na kuih kya kae ap; Pou BAWIPAW , alungzipaw Pachia, kae kha nae shawkhaw vae.

⁶Ccungkia leipaw zohtuh a beik hae paw kha na hua hae, thuasalama kae tuh BAWIPAW kha kae doliaku.

⁷Atynpaw na sungsahnaw liate ka lungtua cih zah ka lungpaw cih, pawccecize ka teingnaw kha nae muihpah zah ka vawsawnaw kha pe nae kipya vae,

⁸ka rhaw hae kuih kalan nae ap khyh; akonaw hmin kya nae cciasah.

⁹Pou BAWIPAW , ka lungvawsaw keiccuze, thaw beih yn ccih; Ka rawnaw ze ka mit phin zah, ka pyn te ka muisaw mah phe roh vae.

¹⁰Ka hiinshe tuh ngaethyanaw te dyadya lia zah, ka kum hae tuh hawkhaekute accyh alia. Ka seinaw keiccuze ka thaw phe thang zah, ka ru hae mah phe mawe hae.

¹¹Ka rhaw hae balyn nynh yn sarya hae, ka innpaw hae nynh yn dothatheih hae, kae ccawkuh hae paw nynh yn ri hae; laanpi kya yn muih hae paw nynh yn ccuetaw hae.

¹²A nyhkuh leipaw a chihpaw hawte yn ning vae hae; ang koipaw hawte nynh ka thua vae.

¹³Ccungccaw patae nynh aruh lante ka thang yn ho hae paw kha ka thae, ka pepan balyn rinaw te phe abeih, kae kha rawsete pynkheihlan khua a khanku hae, kae kha chia lan cite yn paccynnuaku hae.

¹⁴Thuasalama, pou BAWIPAW , nang kha kae doliaku; “Nang tuh ka Pachia nynh na thua,” ka ci.

¹⁵Ka ccyh tuh na kuih kya nynh a um; ka rhaw hae te yn tuaa yn sah hae paw kuih kyate yn luesah tua.

¹⁶Na ryalahtupaw tungvaw kya na mitmae tuh aw sah; atynpaw na sungsahnaw te yn khumtua.

¹⁷Pou BAWIPAW , nang kha kae ko keiccuze, maethyate yn nung nan, ccungccaw hoylei hae paw tuh maethyanaw mue hae sah; Michi khua kya daetedae lan um hae sah.

¹⁸Lysaku, tansaku te miding hae kha rawsete sawtua leinaw byaho hae zah, ahynpaw munglae hae tuh zya dae hae sah.

¹⁹Na raw a rih hae paw hanlan na la ccakhungpaw hoynaw te ccungccaw miakaw muihnaw kyakhe, na kya a rekuh hae paw hanlan na paccynpaw hoynaw tuh pawcih baban mou ahoy!

²⁰Ccungccaw nynh aruh lante paccynnaw kyate akhynpaw na umnaw kyakhe minmin kha na thuruh hae; pekunaw apuisahpaw bya kyate na umnaw kyakhe khyndadyh lan na nung hae.

²¹BAWIPAW tuh thehoysah oh, pawccecize rhaw nynh a koihlupaw khuapi hawte kae kha he yn koihlu hae tuh, atynpaw a sungsahnaw kha ngaeangthua lan um lante yn langsapyaku vae.

²²“Na muihnaw kyate ccaring nae dee vae,” cite thinphangte ka tuaku. Thuasalama bawmnaw mue khylan na kalan he ka sia tuh, kae ngiakunaw kha nae thaepya.

²³Nanning a mithyaa hae balyn, BAWIPAW kha sungsah oh. BAWIPAW nynh mih lungzi hae paw kha a thungkhaw hae, thuasalama a lysakuh hae paw kha myarya ccih lante a liaru hae.

²⁴BAWIPAW a ngaehoikuh hae paw nanning balyn, nae thawsae sah lah, nae rawthung sah.