Read Zotung Chin SAM 32 Bible Online

SAM 32 - Zotung Chin bible

SAM 32

¹David Hlaw A seinaw kha ngaethya athuapaw tuh lungtuapaw nynh thua, a seinaw kha bongpya athua vae.

²BAWIPAW nynh na sei khyh a cipaw, a thinlung kya lingnaw a um leipaw ccungccaw tuh lungtuapaw nynh thua.

³Ka seinaw phyku leite he ka um tuh, anin ninlang ka hawkhaeku keiccuze ka pynsaw phe voi.

⁴Pawccecize khuazi khuadae na kuih nynh phang yn ne; hawnin asopaw keiccuze karae arou hawte ka thawzung tuh karae rou.

⁵Tetuh ka cyiseimenaw kha na kya ka phykuh zah, ka hoyleinaw kha ka thuruh khyh; “Ka seimenaw kha BAWIPAW kalan ka phykuh cih,” ka ci zah, ka seinaw kha nae ngaethya vae.

⁶Tukeiccuze mih lungzi hae paw balyn nynh vawsaw ccyh lya na kalan sawsang hae sah; tui lepaw nynh minmin kha thuanua lan khyh hae.

⁷Nang tuh ka rekunaw hmin nynh na thua; vawsawnaw kyate nae thungkhaw; luenaw hlaw khate kae kha nae koihlu.

⁸Nang kha kae thuihei cih zah na zui lanpaw laanpi kha kae ccangpah cih; nang kha tuanaw pyate kae do-oih cih.

⁹Nythyanaw hoi leipaw marang te lann hae te lokuh nan oh, hynh-e hae tuh mih mung kya rangtei teisahte kia aho hae, tuhkhyhze tuh na pepan um lan khyh hae.

¹⁰Ccungccaw hoylei hae paw tuh vawsawnaw patae a tung hae, thuasalama BAWIPAW a doliakuh hae paw tuh atynpaw sungsahnaw nynh a koihlu hae.

¹¹Pou miding hae, BAWIPAW kya nae lungtua sah lah, nae lungpaw sah, thinlung a ding hae paw balyn, lungtuate sia oh.