Read Zotung Chin SAM 33 Bible Online

SAM 33 - Zotung Chin bible

SAM 33

¹Pou miding hae nanning, BAWIPAW kya nae lungtua sah, Thehoysahnaw tuh miding hae te angaekuhpaw nynh thua.

²BAWIPAW kha tintang te thehoysah oh; arui ruihaw asuikuhpaw tintang te thehoysahnaw hlawsah oh.

³Amaw kalan hlaw thawpaw kha sah oh; kou hoy lan tintang khuakuh oh lah, kou ccae lan hlawsah oh.

⁴Pawccecize BAWIPAW bya tuh ading, rya a lawpaw balyn tuh zyn lan a um.

⁵BAWIPAW nynh dingnaw te byading kha a ry; laephi tuh atynpaw BAWIPAW sungsahnaw te phe abeih.

⁶Vaawlui tuh BAWIPAW bya liate rae thua zah, vaawlui kya umpaw balyn tuh a khalang kya-e hy liate rae athua.

⁷Rili tui hae kha paling lungkhu e tui hawte san kheit kya a ccakhung hae; akhupaw rilipi hae kha ccakhungnaw inn kyakhe a ccakhung.

⁸Laephi pynpi nynh BAWIPAW kha rih sah; laephipi kya-e ccungccaw hae balyn nynh amaw kha sawtua hae sah.

⁹Pawccecize BAWIPAW nynh ho zah, laephi tuh yn um; kaw a pya thyhte tynkaring lan a thadyn.

¹⁰Minphuin hae nynh a paccynku hae paw kha BAWIPAW nynh accakaepaw lang a tangsahpya hae; ccungccaw hae tuakunaw kha a ropya hae.

¹¹BAWIPAW paccynnaw tuh zungzae atyn, a thinlung kya-e a tuanaw hae tuh she takyh hanlan atyn.

¹²BAWIPAW kha mih Pachia lang a hoi hae paw minphuin tuh lungtuapaw minphuin nynh thua, BAWIPAW nynh amaw a rho lang a poku hae paw ccungccaw hae tuh lungtuapaw nynh thua hae.

¹³BAWIPAW nynh vaawram te dobung zah, ccungccaw miakaw kha a muih.

¹⁴A umnaw kyate laephi vaw e ahiinpaw balyn kha do zah, mih cyisahnaw balyn kha marya a muih,

¹⁵mih thinlung balyn kha rae zah, mih cyisahnaw balyn kha marya a muih.

¹⁶Siapharan tuh myarya lungpaw a rhawkaw phupi liate khum thua khyh; rhawkaw tuh a thawzung myarya a um liate luesah thua khyh.

¹⁷Rhawtuknawpaw marang tuh rhaw taenaw hanlan accakaepaw ngaehoinaw nynh thua, myarya lepaw a thungnaw nynh khum kho khyh.

¹⁸BAWIPAW raw a rih hae paw te atynpaw a sungsahnaw a ngaehoikuh hae paw kha

¹⁹chinaw kyate luesah khylan te ccakan a cci lya mih hiinnaw kha khynsah khylan BAWIPAW nynh tyty a do hae.

²⁰Aening muisaw nynh BAWIPAW kha a ngaehoiku; aning tuh aening oun bawmtu te ah khawriaphua nynh thua.

²¹A min thyaapaw kha ah doliaku oh keiccuze aening thinlung tuh amaw kya a lungtua.

²²Pou BAWIPAW , nang kha kae ngaehoiku thyhawte atynpaw na sungsahnaw tuh kae tungvaw um sah.