Read Zotung Chin SAM 35 Bible Online

SAM 35 - Zotung Chin bible

SAM 35

¹David Hlaw Pou BAWIPAW , kae yn rawse hae paw kha rawse hae; kae kha rawsete rhaw yn tuk hae paw kha tuktua hae!

²Khawriaphua te rhawtuknawpaw zunghe kha lawkuh lah, kae kha bawm khylan thoku tua!

³Kae yn deehui hae paw kha rawsete ccoi kha thuaanuakuh hae. “Kae tuh nang ae khumtu nynh ka thua,” cite ka muisaw kha hopya tua.

⁴Ka hiinnaw yn hawkuh hae paw tuh maethyanaw te thethyanaw mue hae sah. Ka tungvaw hoyleinaw yn paccynnuakuh hae paw tuh mih lungmua sah lah, ki hae sah.

⁵BAWIPAW vaaw ccungccapaw nynh minmin kha dee hae sah, khisan nynh a mung hae paw vaekang hawte thua hae sah.

⁶BAWIPAW vaaw ccungccapaw nynh minmin kha dee hae sah, mih laanpi tuh moh sah lah, nawpalaepaw laanpi lang tang sah.

⁷Pawccecize akonglang um leite kaang yn syakhaw hae zah, akonglang um leite ka hiinnaw chia khylan akhupaw hunghua kha yn thaekhaw hae.

⁸Ronaw nynh minmin kha tualeipite thuanua hae sah. Te mimaw nynh a sya hae paw kaang kyakhe kae hae sah; mimaw ronaw hunghu a lungkhu lang ccah hae sah.

⁹Tetuh ka muisaw tuh BAWIPAW kya a lungtua cih, yn luesah keiccuze ka lungpaw cih.

¹⁰Ka ru ka khua hae balyn nynh, “Pou BAWIPAW , nang ae lopaw hummou a um? Anyaa hae paw kha athung hae paw kyate na luesah hae, ryachi hae te anyaa hae paw kha luade a mang hae paw kyate na luesah hae,” cite a ho cih hae.

¹¹Ahme leipaw ccaekia hae nynh yn thokuh hae zah, ka ny leipaw uccaw kong kha yn khia hae.

¹²Minmin nynh ahoypaw kha athahpaw te yn liaru hae zah, ka lung phe thang.

¹³Thuasalama minmin tuh a cci vae hae ze, ngaethyanaw buriboei ka lawkuh zah, kamaw te kamaw taeekute looh-ae ka sung. Ka by vawlan ka lu bakhungte saw ka sang,

¹⁴ka ban hae te ka uno hae hanlan ka ngaethya hawte ka ngae athah; lukhakheit nynh a nung elang a raw a khui hawte, ka bakhung zah rawkhuite ka um.

¹⁵Thuasalama kae nynh he ka khuliakuh tuh, lungpawte a sueluakuh hae, kae kha rawsete a sueluakuh hae; ka ny lei hae paw a puatho hae paw nynh kae kha umtaw leite yn zia hae;

¹⁶kae kha houhouh yn sarya hae zah, mih haw kha yn zynua hae.

¹⁷Pou BAWIPAW , hohseciamou phang nae do ung cih? Minmin nynh rokunaw kyate yn luesah lah, ka hiinnaw kha chindeih hae kyate yn luesah!

¹⁸Tetuh a pumkuh hae paw pataepi kyakhe kae thehoysah cih; ccungccaw pataepi kyakhe kae thehoysah cih.

¹⁹Ahynhupaw ka rhaw hae tuh ka tungvaw mih lungtua nan sah, kae yn hua hae paw tuh akonglang um leite mih mit masipakuh nan hae sah.

²⁰Pawccecize daenaw byaho leite, ram lungkhu kya daebabi lan um hae paw kha rawsete hynhupaw bya kha ho lan a paccynku hae.

²¹Mih khalang kha yn awnua hae zah, “Alei, Alei, na cyipaw kha kae mit te phe kae muih vae,” a ci hae.

²²Pou BAWIPAW , phe na muih vae, daebabi lan um nan! Pou BAWIPAW , ka kyate beih sawkuh nan!

²³Thotua! Kae hynh thungkhaw khylan namaw te namaw lungthosaku tua, ka Pachia te ka BAWIPAW , ka hanlan yn cyipya tua!

²⁴Pou BAWIPAW ka Pachia, nang tuh adingpaw na thua thyhawte, seinaw a hoi leipaw nynh thua cite bya beih yn piatua, minmin tuh ka tungvaw mih lungtua nan sah.

²⁵Mimaw te mimaw kha, “Alei, kae lungry phe ccing vae,” cite hokuh nan hae sah. Minmin nynh, “Nang kha phe kae laang vae,” cite ho nan hae sah.

²⁶Hoyleinaw ka tung lyaze mih lungtuapaw balyn tuh maethyanaw mue hae sah lah, mih lungmua sah; kae kha rawsete mimaw te mimaw a hangsakuh hae paw tuh maethyanaw te thethyanaw kha mue hae sah.

²⁷Seinaw ka hoi leinaw kha a ry hae paw tuh lungtuate sia hae sah lah, mih lungpaw sah, “A ryalahtu hae hoynaw kha a lungrythuapaw BAWIPAW tuh alesae,” cite palei ho hae sah.

²⁸Oute ka munglae nynh na dingnaw kha a ho cih zah, anin ninlang kae thehoysah cih.