Read Zotung Chin SAM 40 Bible Online

SAM 40 - Zotung Chin bible

SAM 40

¹David Hlaw BAWIPAW kha lungsaete ka ngaw; yn ngaepah zah ka siapaw kha yn thaepya.

²Ri lan umpaw akhupaw lungkhu te thuasah, tuiccua lungkhu te thuasah kae kha poh yn thuaa, ka ccu kha lungpi vawlan khe yn khang zah, ka ccianaw kha yn khynsahpya.

³Ah Pachia thehoysahnaw hlaw, hlaw thawpaw kha yn sahsah. Ccungccaw patae nynh muihte a rih cih hae zah, BAWIPAW kha a doliakuh cih hae.

⁴Lysakunaw kalan maeleihkuh khyh zah, ahme leipaw pachia kalan cciasei leite, BAWIPAW kha a doliakuhpaw tuh lungtuapaw nynh thua.

⁵Pou BAWIPAW ka Pachia, kaening hanlan ngaeang lan umpaw na ryalaw hae te na khuakhannaw hae tuh myarya alung vae; nang te khinkhia lanpaw hum sanmah um khyh. tuh-e balyn tuh ka ho ka ria lanze, hotae riatae um lan khyh.

⁶Silawnaw te silawnaw uccaw kha na rypaw thua khyh, ka nakaring kha nae uasah vae. Maee-ute silawnaw te seishawnaw silawnaw kha nae ngiapaw thua khyh.

⁷Tetuh kae nynh, “E kya mang ka um; ccauh akuekuhpaw kya ka hanlan na zeipaw mang a um.

⁸Pou ka Pachia, na rynaw rae tuh ka lungrythuakhaekuh; na ccangpyanaw tuh ka thinlung kya a um,” cite kae khung.

⁹Zapi pumkunaw kyakhe nae luesahnaw thehoypaw kha ka ho vae; Pou BAWIPAW , tuh-e hopaw tuh ka umtaw lan khyh cipaw na ny.

¹⁰Nae khum zah nae bawmnaw kha ka thinlung kya ka thuruh khyh, Na lungzinaw te na khumnaw kha ka ho vae; atynpaw na sungsahnaw te na lungzinaw kha zapi pumkunaw kya ka phei khyh.

¹¹Pou BAWIPAW , na thawccinaw kha yn kang nan; atynpaw na sungsahnaw te na lungzinaw nynh zungzae yn khynsah sah.

¹²Pawccecize riatae um leipaw hoyleinaw nynh phang yn koihlu; ngaw ka muih kho lei lan ciate ka seinaw nynh phe yn phya vae; ka sangrua laeze lung zah, ka lungthaw phe azya.

¹³Pou BAWIPAW , kae kha beih yn luesah rytua; Pou BAWIPAW , arangte beih yn bawmtua.

¹⁴Kae kha chia lan yn paccynnuakuh hae paw balyn tuh maethyanaw mue hae sah lah, mih lungmua sah. vawsaw yn tungsah ry hae paw tuh mih nulang maekuh hae sah lah, thethyanaw mue hae sah.

¹⁵“Alei, Alei!” cite yn sarya hae paw tuh mih maethya keiccuze siikuh hae sah.

¹⁶Thuasalama nang ae ccung hae paw balyn tuh namaw kya mih lungtua sah lah, mih lungpaw sah. Na khumnaw a ry hae paw nynh, “BAWIPAW tuh alesae!” cite palei ho hae sah.

¹⁷Kae tuh a ryachipaw te anyaapaw nynh ka thua, thuasalama Bawipaw nynh yn ning khyh. Nang tuh yn bawmtu te yn luesahtu nynh na thua, Pou ka Pachia, na thysung nan sah.