Read Zotung Chin SAM 41 Bible Online

SAM 41 - Zotung Chin bible

SAM 41

¹David Hlaw Ryachi hae hanlan a tua a roihpaw tuh lungtuapaw nynh thua, a vawsaw ccyh lya BAWIPAW nynh a luesah cih.

²BAWIPAW nynh a thungkhaw cih zah, a hiinnaw kha a khynsah cih; ram lungkhu kya lungtuate a umsah cih. Aning kha a rhaw hae rynaw kalan na ap lan khyh.

³Dan khyh zah a hueku lyakhe BAWIPAW nynh a bawm cih; a ccinaw kyate bua a dansah cih.

⁴Kae nynh, “Pou BAWIPAW , na tungvaw ka sei vae keiccuze thaw beih yn ccih lah, yn dansah,” ka ci.

⁵“Hohtuh vema a chih cih zah a min azo cih?” cite ka rhaw hae nynh mih eiung zah a hoku hae.

⁶Kae kha muih khylan he yn ccia hae ze, accakaepaw bya kha ho hae zah, mih thinlung kya hoyleinaw kha a ccakhungku hae; he a pou hae te, tuh-e tuh teitei kya balyn a ho hae.

⁷Kae yn hua hae paw balyn nynh ka konglang byaru a hoku hae; ka hanlan ahoy leipaw kha a paccyn hae.

⁸A chisah khopaw uccaw tuh a tungvaw phang bekuh vae zah, a huekunaw kyate bua thokuh vae lan khyh cite a tua hae.

⁹Ka doliakupaw, ka looh a aepaw ka ban hoypaw nynh heize, kae kha rawsete a ccu yn hangnua vae.

¹⁰Pou BAWIPAW , minmin kha ka liaru kho nawlan hae, thaw yn ccih lah, yn thosahku tua.

¹¹Tuhcite ka rhaw nynh yn tae khyh keiccuze, ka tungvaw na lungrythua cipaw ka ny.

¹²Ka ccingnaw keiccuze nae bawm zah, na kya zungzae nae umsah vae.

¹³BAWIPAW , Israel Pachia kha zungzae te zungzae cia thehoysah oh sih. Amen, Amen.