Read Zotung Chin SAM 50 Bible Online

SAM 50 - Zotung Chin bible

SAM 50

¹Asaf Hlaw Alesaepaw BAWIPAW Pachia nynh bya a ho, khuanin a thuanaw langte a ccawnaw lang cia laephi kha a ko.

²Puithyanaw phe accingnaw Zion mua kyate Pachia tuh khuanin hawte yn aw.

³Ah Pachia tuh yn cceih zah, daebabi lan um khyh, a malang khe arua cciamangpaw maee um zah, a pepan balyn khe a thawsaepaw khise atho.

⁴A ccungccaw hae kha byapia khylan ahangnaw vaaw te lae kha ko hae zah,

⁵“Silawnaw te kamaw ryte byakinnaw a rae hae paw, alungzipaw ka mithyaa hae, ka kalan oun sueluakuh oh!” a cipya hae.

⁶Pachia amaw ccaccei hynh byapiatu athua keiccuze, vaawlui nynh a dingnaw kha a siakhae.

⁷“Pou ka ccungccaw hae, ngaetua oh, bya ka ho cih, Pou Israel, nang kha rawsete ccaekia ka khan cih. Kae tuh Pachia, na Pachia nynh ka thua.

⁸Ka malang si na law zungzaepaw maee-ute silawnaw te silawnaw aphuinphuin keiccu nang kha kae pe khyh.

⁹Na inn kya-e tangnuapaw thuasah, na miaa phu kya-e miaa hae thuasah ka ccou lan khyh.

¹⁰Pawccecize ramkaw e loramsaw miakaw te mua thong kheit vawlan umpaw sahiin hae tuh ka kya-e nynh thua.

¹¹Vaawlang e pavaw hae balyn te ramkaw e apiathyapaw balyn tuh ka kya-e nynh thua.

¹²“Ka vuelaw ze, nang kha kae hopah lan khyh, pawccecize laephi te laephi kya umpaw balyn tuh ka kya-e nynh thua.

¹³Tangnuapaw saw kha ka ae tou? Miaa chii kha ka neih tou?

¹⁴Pachia kalan lungtua silawnaw kha rae oh lah, Ahang Huaccepaw kalan byakinnaw kha rae oh.

¹⁵Vawsaw ccyh lya kae kha oun ko oh; kae luesah cih oh zah, kae kha nae thehoysah cih oh,” a ci.

¹⁶Thuasalama Pachia nynh ccungccaw hoylei hae paw kha: “Pawcce ka phungbya hae kha nae khalang te na zaeku oh? Pawcce ka byakinnaw kha nae mung te na ho oh?

¹⁷Thuiheinaw kha na hua oh zah, ka bya kha nae nulang khe na vua oh.

¹⁸Miruh kha na muih oh ze, ruiban lang na raeku oh, milae zu milae vawpaw kha a seikhae hae paw ryte na mungku oh.

¹⁹“Nae khalang tuh hoyleinaw kha rythyte na hosah oh zah, nae lae nynh lingnaw bya kha a paccyn.

²⁰Na haung oh zah nae uno hae rawsenaw bya kha na ho oh; nae nung a ccaaw kha a thethya na ho oh.

²¹E hae hynh na cyih oh zah, kae tuh daebabi lan ka um; tukeiccuze kae hynh naemaw tahawpaw lang nae ria oh. Thuasalama atu tuh kae pe vae cih oh zah, khah-e hae kha ccaerarih lan kae nysah vae cih oh.

²²“Pachia a ning hae paw nanning, e hynh syntawkuh oh, tuhkhyhze tuh nanning kha zoihtatae lan kae pae cih oh zah, ae khum cih oh paw lu kheit san um lan khyh.

²³Silawnaw raete ka kalan lungtuanaw a langsakuh hae paw tuh saw yn tua hae paw nynh thua; ahmepaw laanpi a zui hae paw kyakhe Pachia khumnaw kha ka langsakuh cih,” a ci.