Read Zotung Chin SAM 56 Bible Online

SAM 56 - Zotung Chin bible

SAM 56

¹[18] Pou Pachia, thaw beih yn ccitua, pawccecize ccungccaw hae nynh yn syde hae; rhaw hae nynh anin ninlang yn tuaa yn sah hae;

²ka rhaw hae nynh anin ninlang yn syde hae, ccungccaw patae nynh rawsete yn dou hae. Pou Ahang Huaccepaw,

³he ka ri vae ze, nang kha kae doliaku.

⁴Pachia bya kha the ka hoysah, Pachia kha ka doliaku keiccuze ka rih khyh; ccungccaw nynh pawmou yn cyih kho cih?

⁵Ka rhaw hae nynh ka cyipaw kyakhe anin ninlang vawsaw yn pya hae; mih tuanaw balyn tuh ka tungvaw hoyleinaw hanlan nynh thua.

⁶Pekumaekunaw kha puisah hae zah, buhkhawte ka ccianaw kha yn dokhaw hae. Ka hiinnaw chia khylan a ngaehoi lya hae khe,

⁷mih hoyleinaw keiccuze minmin kha liarutua hae; Pou Pachia, tuh-e ccungccaw hae kha thinriate khuliatua hae!

⁸Ka ngaethyanaw kha phe na ny vae; ka mitphi kha na tuihinbu lungkhu phe na ruin vae. Tuh-e hae tuh na ccauh kya na zei vae khaw?

⁹Oute nang kha he kae ko nin khe, ka rhaw hae tuh nulang a ki cih hae. Pachia tuh ka kalan a pan cipaw ka ny.

¹⁰Pachia bya kha the ka hoysah, BAWIPAW bya kha the ka hoysah,

¹¹Pachia kha ka doliaku keiccuze ka rih khyh. ccungccaw bali nynh pawmou yn cyih kho cih?

¹²Pou Pachia, na kya bya ka kinkupaw kha ka cyih hahe cih; na kalan lungtuanaw silawnaw kha ka rae cih.

¹³Pawccecize chinaw kyate ka hiinnaw kha nae luesah vae, Pachia malang, hiinnaw awnaw kya ka ccia kho nawlan, ka ccu kha khuliakunaw kyate nae luesah.