Read Zotung Chin SAM 59 Bible Online

SAM 59 - Zotung Chin bible

SAM 59

¹[21] Pou ka Pachia, ka rhaw hae kyate yn luesah tua; kae kha rawsete yn thonuakuh hae paw kyate yn thungkhawtua.

²Hoyleinaw rya a lah hae paw kyate yn luesah tua; ccungccaw a theih hae paw kyate yn khumtua.

³Atumaw heize ka hiinnaw chia khylan yn buhkhaw hae; athungpaw ccungccaw hae nynh pekumaeku yn hyy hae. Pou BAWIPAW , ka cyiseinaw te ka seinaw keiccu thua khyh,

⁴ka cyiseinaw a um lei pite, yn ccuenua hae zah, yn paccynnuaku hae. Kae kha bawm khylan yn thokuh lah yn dotua.

⁵BAWIPAW vaaw hae Pachia, nang tuh Israel Pachia nynh na thua. Minphuin balyn detah khylan thoku tua; a hynhupaw ccungccaw hoylei hae paw kha lu kheit sanmah haang nan hae.

⁶Minmin tuh zete takyh oun ki hae zah, ui hawte siate khua lungkhu a khiavuikuh hae.

⁷Mih khalang te thawte a sia hae, mih mung kyakhe thaloi hawte ahepaw bya um zah, “Hum nynh mou oun thae cih?” a ci hae.

⁸Thuasalama, pou BAWIPAW , minmin kha na nuinse hae; minphuin balyn kha na sarya hae.

⁹Pou ka thawzung, nang kha kae ngaehoikuh cih; Pou Pachia, nang tuh ka rekunaw nynh na thua.

¹⁰Ka Pachia nynh atynpaw a sungsahnaw te kae kha yn tungkuh cih; ka Pachia nynh ka rhaw hae tungvaw taenaw yn muesah cih.

¹¹Pou BAWIPAW , kae khawriaphua, minmin kha theih nan hae, tuhkhyhze tuh ka ccungccaw hae nynh a ningsei cih hae; na huhan te minmin kha phia hae lah, nyaasah bung hae.

¹²Mih khalang kya-e seinaw, mih munglae kya-e bya hae keiccuze, mih lysakunaw kya kaangkae hae sah. A ho hae paw thyalawnaw bya te hynbya keiccuze,

¹³thinriate minmin kha phe maemih hae; phe a zo lan hae cia, maemih hae. Tetuh Pachia nynh Jakob phuin kha uk zah, laephi athangnaw cia a uk cipaw a nyh cih hae.

¹⁴Minmin tuh zete takyh oun ki hae zah, ui hawte siaruate khua lungkhu a khiavuikuh hae.

¹⁵Looh ccungku khylan khiavuikuh hae zah, ae khin a mueku khyh hae ze, a ccohkuh hae.

¹⁶Thuasalama na thungnaw kha hlaw te ka sah cih; awkhua takaw khe atynpaw na sungsahnaw kha hlaw te ka siakhae cih. Pawccecize nang tuh ka rhawlungrua na thua vae zah, ka vawsaw ccyh lya ka khynnaw nynh na thua.

¹⁷Pou ka thawzung, na kalan thehoysahnaw hlaw ka sah cih, Pou Pachia, nang tuh ka rhawlungrua nynh na thua, atynpaw sungsahnaw yn langsapakuhpaw Pachia nynh na thua.