Read Zotung Chin SAM 60 Bible Online

SAM 60 - Zotung Chin bible

SAM 60

¹[22] Pou Pachia, kaening kha nae vua vae zah, kae thungkhawkunawpaw kha nae khyapya vae; kae tungvaw na thinria vae, atu tuh kaening kalan beih yn maekuh ccavae!

²Laephi kha na hysah zah, haehae ua lan na koisah vae; laephi tuh a hy keiccuze a koinaw kha pingsah tua.

³Na ccungccaw hae kha vawsaw na teingsah hae; kaening oun ruisahpaw misutui kha nia lan nae pya vae.

⁴Namaw ae rih hae paw hanlan syntawnaw alan kha na saepya vae hae, tuh-e tuh the te li kyate a lue kho nawlan hae nynh thua.

⁵Na sungsah hae paw kha luesah athua nawlan hae, na ranglang kuih te taenaw oun pya lah, kae sawsangnaw kha oun thaepya tua.

⁶Pachia nynh a beikinnthyaa kyakhe, “Shekhem kha myarya lungtuate thoh ka phia cih, te Sukkoth Bialae kha ka nee cih hae.

⁷Gilead ram tuh ka kya-e nynh thua, Manasseh mah ka kya-e nynh thua; Efraim tuh ka lukhung thua zah, Judah tuh ka ccoi nynh thua.

⁸Moab tuh tui ka singkunawpaw ka tuipung nynh thua; Edom tuh ka ccukoh te ka synaw nynh thua; Filistin ram kha taenaw roi te ka sia,” a ci.

⁹Hum nynh mou kae kha koihkhawpaw khuapi lungkhu lang yn teekhae cih? Hum nynh mou kae kha Edom lang yn cciakhae cih?

¹⁰Pou Pachia, kaening kha phe nae vua vae khyh tou? Pou Pachia, kae rhawkaw hae ryte na cceihkheih khyh oh tou?

¹¹Kae rhaw hae kha rawsete kaening hynh bawmnaw beih oun pya, pawccecize ccungccaw bawmnaw tuh ccungkia khyh.

¹²Pachia liate rawthungte kae cyih cih; kae rhaw hae kha a syde cih paw tuh amaw nynh thua.