Read Zotung Chin SAM 62 Bible Online

SAM 62 - Zotung Chin bible

SAM 62

¹David Hlaw Ka muisaw nynh Pachia rou kha daebabi lan a ngaehoi; ka khumnaw tuh amaw kyate nynh yn thua.

²Pachia rou hynh nynh ka lungpi, ka khumnaw te ka khynnaw athua; kae tuh yn piasah kho lan khyh hae.

³Nanning nynh hohseciamou lu kheitpaw kha na rawse ung cih oh? Vyavya pupaw lungrua, vyavya khuliakuhpaw tureih hawte athuapaw amaw kha nae balyn te hohseciamou na rawse cih oh?

⁴Tuh-e paw kha phu-e a ccounaw kyate sawbung lan a paccynku hae. Minmin tuh hynbya kyakhe mih lungrythua; mih khalang te hythuapya hae salamah mih lungkhu kyate thya a law hae.

⁵Ka muisaw nynh Pachia rou kha daebabi lan a ngaehoi, pawccecize ka ngaehoinaw tuh amaw kya rou nynh a um.

⁶Amaw rou hynh nynh ka lungpi, ka khumnaw te ka khynnaw athua; kae tuh yn piasah kho lan khyh hae.

⁷Ka luenaw te ka sung-enaw tuh Pachia kya nynh a um; athungpaw ka lungpi, ka khynnaw tuh Pachia nynh thua.

⁸Pou ccungccaw hae, Pachia kha doliakuh zungzae oh; nae thinlung kha amaw malang khe hungpah oh; Pachia tuh aening khynnaw nynh thua.

⁹Anyaapaw ccungccaw hae tuh ccungkia leipaw nynh thua hae, aly-asaepaw ccungccaw hae tuh a hynhupaw nynh thua hae; akhin sae lan hae ze, zawbahaepaw nynh thua hae; minmin tuh hy laeze a zawhua hae.

¹⁰Puathonaw kha doliakuh nan oh, Luadenaw kha ngaehoikuh nan oh; a hoirum hae paw nynh a hoithung hae ze doliakuh nan hae.

¹¹Pachia nynh vaekheit a ho vae; vaeningnaw ho zah ka thaepaw tuh: huhan tuh Pachia kya-e nynh thua,

¹²Pou BAWIPAW , atynpaw sungsahnaw tuh na kya-e nynh thua. Ccungccaw balyn kha mih ryalawnaw thyhte na pyaru hae.