Read Zotung Chin SAM 64 Bible Online

SAM 64 - Zotung Chin bible

SAM 64

¹David Hlaw Pou Pachia, vawsawnaw ka tung lya, ka sawsangnaw hynh yn thaepya tua; ri lan umpaw rhaw hae kyate ka hiinnaw hynh yn khynsah tua.

²Ccungccaw hoylei hae paw nynh aruh lante khuakhankunaw hae kyate thuasah, hoyleinaw a rae hae paw paccynkunaw kyate thuasah yn thuruhtua.

³tuh-e hae tuh mih lae kha thaloi hawte a taw hae, bya khahpaw kha the hawte a kawnaw ry hae,

⁴A buhkhawnaw hae kyate ccaenaw a um leipaw kha a kaw hae; ri leite palou a kaw hae.

⁵Ahoy leipaw mih eenaw kha tynkaring lan a kyngku hae; aruh lante kaang syakhawnaw kong kha hokuh hae zah, “Hum nynh mou aening hynh oun muih?

⁶Hoyleinaw ah rae oh paw hynh hum nynh mou oun nyh kho cih? Athyaruhpaw paccynkunaw khua kha phe ah khan vae oh,” a ciku hae. Pawccecize ccungccaw thinlung te tuakunaw tuh kou akhu.

⁷Thuasalama Pachia nynh a the te minmin kha a kaw cih hae zah, vaemaw palou a mue cih hae.

⁸Mih lae nynh mimaw kha ronaw kalan a cciakhae cih hae; minmin kha a muih hae paw balyn tuh rinaw te a thyngkuh cih hae.

⁹Tetuh ccungccaw miakaw a rih cih hae; Pachia nynh a cyipaw kong kha minmin nynh a ho cih hae zah, a cyipaw kha a tua cih hae.

¹⁰Miding hae tuh BAWIPAW kya mih lungtua sah lah, amaw kya rekuh hae sah. Miding balyn nynh mih thinlung te thehoysah hae sah.