Read Zotung Chin SAM 66 Bible Online

SAM 66 - Zotung Chin bible

SAM 66

¹Hlaw Laephi ccungccaw hae balyn, Pachia kalan lungtuate sia oh;

²a min phu-esahnaw hlaw kha sah oh; aphu-epaw thehoysahnaw kha amaw kalan pya oh.

³Pachia kalan khe, “Na cyipaw uccaw hae hynh pawcih baban mou ngaeang lan a um! Na huhan tuh myarya ale keiccuze, na rhaw hae tuh na malang rawrite a bakhung hae.

⁴Laephi ccungccaw hae balyn nynh nang kha ae beik hae; namaw thehoysahnaw hlaw kha a sah hae, na min thehoysahnaw hlaw kha a sah hae,” cite ho oh.

⁵Rang oh lah, Pachia nynh a cyipaw hynh dotua oh: ccungccaw hae kya a cyipaw balyn tuh ngaeangthua lan a um.

⁶Rili kha laerou lang a tangsah; ah minpaaw hae nynh vawpi kha mih ccu te a zua hae. Tuin kyakhe aening tuh amaw tungvaw ah lungtua,

⁷a thungnaw liate zungzae a uk, a mit nynh minphuin hae kha riri a do hae, kaw-ei hae paw nynh mimaw te mimaw kha hokuhthung nan hae sah.

⁸Pou ccungccaw hae, ah Pachia kha thehoysah oh, amaw thehoysahnaw roi kha thae hae sah,

⁹amaw nynh a hiin hae paw laku kya oun do-oih zah, ah ccu kha theisah khyh.

¹⁰Pou Pachia, nang nynh kaening kha nae syntawtua; ngun kha maee te a syntawtua hae hawte kaening kha nae syntawtua vae.

¹¹Kaening kha kaang nae kaesah vae; kae ke kya phupaw ripaw nae khang vae;

¹²ccungccaw hae kha kae lu vawlan na ccisaku vae hae; maee te tui kyakhe kae cceih; tuhzemah kaening kha hoirumnaw hmin kya nae thuasah vae.

¹³Maee-ute silawnaw kha ccyngte na inn lungkhu lang ka cceih cih; bya ka kinkupaw kha kae pya cih,

¹⁴Vawsawnaw ka tung lyaze ka mung nynh ho zah, ka khalang nynh bya a kinkupaw kha kae pya cih.

¹⁵Athopaw tuu hae kha mynkhuhpaw ryte namaw kalan maee-ute silawnaw ka rae cih; tangnuapaw te miaa hae khate silawnaw ka rae cih.

¹⁶Pachia rawrih hae paw balyn, rang oh lah, ngaetua oh, ka hanlan yn cyipyapaw kha kae hopah cih oh.

¹⁷Amaw kalan thawte ka sia zah, ka lae te amaw kha the ka hoysah.

¹⁸Ka thinlung kya hoyleinaw kha ka la tua ry lanze, BAWIPAW nynh yn ngaepah lan khyh.

¹⁹Thuasalama Pachia nynh yn ngaepya ccaccing; ka sawsangnaw roi kha yn ngaepya vae.

²⁰Ka sawsangnaw kha yn vuapah khyh zah, atynpaw a sungsahnaw kha ka kyate a nue khyh keiccuze Pachia kha ka thehoysah.