Read Zotung Chin SAM 71 Bible Online

SAM 71 - Zotung Chin bible

SAM 71

¹Pou BAWIPAW , namaw kya ka rekuh; maethyanaw kharouh yn muesah nan.

²Na dingnaw te yn luesah lah, yn khumtua; na nakaring kha ka kalan yn tuakuh lah, yn khumtua.

³Ka hanlan khynnaw lungpi thua lah, kae kha khum khylan atynpaw rhawlungrua thuatua, pawccecize nang tuh ka lungpi te ka rhawlungrua nynh na thua.

⁴Pou ka Pachia, ccungccaw hoylei hae paw kuih kyate thuasah, a ding lei hae paw te mih rysawthah hae paw kuih kyate thuasah kae kha yn luesah tua.

⁵Pou Bawipaw, nang tuh ka ngaehoinaw nynh na thua, Pou BAWIPAW , ka di lya mawte kae doliakupaw nynh na thua.

⁶Ka pui takaw te nang kha kae reihpeku vae; ka nung vue kyate yn puisahpaw tuh nang nynh na thua. Nang kha po kae thehoysah cih.

⁷Kae hynh ccungccaw patae hanlan muihsahnaw hawte nynh ka thua, thuasalama nang tuh atynpaw ka khynnaw nynh na thua.

⁸Anin ninlang ka mung nynh nang kha ae thehoysah zah na phu-enaw kong kha a ho.

⁹Ka taw vae ze, yn vua nan; ka thawzung athang vae ze, yn vua nan.

¹⁰Ka rhaw hae nynh ka konglang hokuh hae zah, kae kha chia yn ry hae paw ryte pynkheihlan khua a khanku hae.

¹¹“Pachia nynh a vua vae paw, khuh-e ccungccaw khuh deehui oh sih lah, kyng oh sih, pawccecize amaw a khum lanpaw hum sanmah um khyh,” cite a hoku hae.

¹²Pou Pachia, ka kyate beih sawkuh nan; Pou ka Pachia, arangte yn bawmtua!

¹³Kae yn rawse hae paw tuh maethyanaw ccou hae sah lah, roh hae sah; vawsawnaw tungsah yn ry hae paw tuh saryanaw te thethyanaw ccou hae sah.

¹⁴Kae tuh po ka ngaehoi cih zah, nang kha houhouh kae thehoysah cih.

¹⁵Na dingnaw te na khumnaw kha anin ninlang ka ho cih, tuh-e hae tuh ka ny khonaw laeze alung zemah ka ho cih.

¹⁶Bawipaw PACHIA kya-e athungpaw ryalawnaw hae kha ka thehoysah cih, na dingnaw kyalya kha ka siakhae cih.

¹⁷Pou Pachia, ka di lya mawte nae ccangpya vae, ngaeangthua lan umpaw na ryalawnaw hae kha palei ka siakhae ung.

¹⁸Pou Pachia, ka taw vae zah, ka sang phe paw lang cia, yn thua cih paw she hae balyn kya na thungnaw kha ka siakhae mawlaezung kae kha yn vua nan.

¹⁹Pou Pachia, na huhan te na dingnaw nynh ahangpaw vaawlui phe a phya. Myarya lepaw uccaw hae a raepaw, pou Pachia, nang ae lopaw hummou a um?

²⁰Vawsawnaw te runaw patae yn tungsahpaw nang nynh kae kha thawzung nae pyathui cih; akhupaw laephi kyate kae kha bua nae thuaa cih.

²¹Sawtuakunaw houh nae pya cih zah, ngaengannaw kha bua nae pya cih.

²²Pou ka Pachia, alungzipaw na thua keiccuze nang kha tintang te kae thehoysah cih. Pou Israel hae Pachia Athyaapaw, tintang khuakute na kalan thehoysahnaw hlaw ka sah cih.

²³Na kalan thehoysahnaw hlaw he ka sah te, ka khalang te lungtuate ka sia cih. na khum vae paw ka muisaw mah a lungtua cih.

²⁴Ka lae nynh adingpaw na bawmnaw kong kha anin ninlang a ho cih, pawccecize vawsawnaw pya lan yn zuanuakuh hae paw tuh maethyanaw mue hae zah, mih thethah vae.