Read Zotung Chin SAM 72 Bible Online

SAM 72 - Zotung Chin bible

SAM 72

¹Solomon Hlaw Pou Pachia, na byading kha siapharan kalan pya lah, na dingnaw kha siapharan ccapaw kalan pyatua.

²Aning nynh na ccungccaw hae kha dingnaw te byapia hae sah lah, na kya-e ryachi hae kha byading te byapia hae sah.

³Mua hae nynh ccungccaw hae hanlan hoirumnaw thuakhae hae sah lah, sangpyng hae nynh dingnaw kha thuakhae hae sah.

⁴Tuh-e siapharan nynh ccungccaw hae kyaze ryachi hae kha thungkhaw hae sah lah, ahobou hae paw kha luenaw pya hae sah, te vawsaw pyatu hae kha tae hae sah.

⁵Khuanin te sawpaw atyn lungkhu balyn, she takyh kya minmin nynh nang kha ae rih hae sah.

⁶Tuh-e siapharan tuh aw kou takawpaw lonua vawlan accahpaw khuaa hawte thua sah lah, laephi a ciasahpaw khuaa hawte thua vae sah.

⁷A she lungkhu kya dingnaw tuh lethung sah lah, sawpaw a zo makhia daenaw um sah.

⁸Rili ccangkheit kyate ccangkheit kyacia uk sah lah, Zufrates vawpi kyate laephi adianaw cia uk sah.

⁹Laesia ram um hae paw nynh a malang khe bakhung hae sah lah, a rhaw hae nynh laenoi kha lya hae sah.

¹⁰Tarshish siapharan hae te tuikoih siapharan hae nynh ngunto pya hae sah lah, Sheba te Seba siapharan hae nynh lasung ccyngpah hae sah.

¹¹Siapharan balyn nynh a malang bakhung hae sah lah, minphuin balyn nynh amaw rya kha lawpah hae sah.

¹²Pawccecize ahobou hae paw nynh amaw kha a ko hae ze luesah hae zah, ryachi hae te bawmtu hoi lei hae paw kha a luesah hae.

¹³Ryachi hae te minyaa hae kha thawccih hae zah, minyaa hae hiinnaw kha a khum hae.

¹⁴Tuaasahnaw te puathonaw kyate mih hiinnaw kha a shawkhaw hae; mih chii tuh amaw muihnaw kya aphute.

¹⁵Siapharan tuh a she sae vae sah! Sheba sui kha amaw kalan pya vae hae sah. Amaw elang zungzae sawsangpah hae sah lah, Nin takyh hythuapya hae sah.

¹⁶Ram lungkhu kya looh patae um sah; a ccathae tuh Lebanon mua hae kya-e hawte mua dung hae vawlan khe luiluih hy sah; khuapi kya-e ccungccaw hae tuh loo kya-e lonua hae hawte khuapi kyakhe apaw paw hae sah.

¹⁷A min tuh zungzae tyn sah lah, a minthaannaw tuh khuanin a um lungkhu balyn po tyn sah. Minphuin balyn tuh amaw liate hythuaccou hae sah; aning tuh hythua ccoupaw nynh thua cite minmin nynh ho hae sah.

¹⁸Israel Pachia BAWIPAW tuh thehoysah oh, aning kyalya nynh ngaeangthua lan umpaw uccaw hae kha a rae.

¹⁹A phu-epaw a min kha zungzae thehoysah oh; a phu-enaw tuh laephi pynpi phe beih sah. Amen, Amen.

²⁰Jesse ccapaw David sawsangnaw athang vae.